ახალციხის თვითმმართველობის საკონკურსო კომისიას წყრუთის რწმუნებულობის პრეტენდენტი უჩივის

საპრეტენზიო კომისიას არარატ ჩახოიანმა მიმართა, რომელსაც განაცხადი წყრუთის ტერიტორიული ორგანოს რწმუნებულის ვაკანსიაზე ჰქონდა შეტანილი.

„მონაწილობა მივიღე კონკურსში, უარი მეთქვა და ჩემს ადგილზე დაინიშნა სხვა, რომელიც ვერ აკმაყოფილებდა საკონკურსო პირობებს“,- ნათქვამია არარატ ჩახოიანის საჩივარში.

საპრეტენზიო კომისიის თავმჯდომარის მაკა სუდაძის განმარტებით, საჩივარი განხილვის პროცესშია: „გადაწყვეტილება ჯერ არ მიგვიღია. სამი დღის ვადა გვაქვს, რომ პასუხი გავცეთ“.

ადგილობრივი თვითმმართველობის მოხელეთა შესარჩევმა საკონკურსო კომისიამ კონკურსში გამარჯვებული მოქალაქეების სია გუშინ, 4 თებერვალს გამოაქვეყნა. შედეგით უკმაყოფილო კონკურსანტებს საპრეტენზიო კომისიაში საჩივრის შეტანა ორი დღის ვადაში შეუძლიათ.

„პასუხის მიღებიდან, ანუ ცნობიდან, ორი დღის ვადაში უნდა მოგვმართონ. რადგან ფოსტით გაიგზავნა, ვინ როდის მიიღებს, ეგ აღარ ვიცი. ერთი განცხადების გარდა, ჩვენ დაგვიკავშირდა თენგიზ ზედგინიძე და კომისიის დასახელება იკითხა. შემოიტანს თუ არა საჩივარს, ვერ გეტყვით“,- ამბობს მაკა სუდაძე.

შეგახსენებთ, რომ თენგიზ ზედგინიძე წლების განმავლობაში ახალციხის მუნიციპალიტეტის გამგეობაში ეკონომიკისა და ინფრასტრუქტურის სამსახურის უფროსის პოზიციაზე მუშაობდა და ამავე ვაკანსიაზე ჰქონდა განაცხადი შეტანილი. თუმცა საკონკურსო კომისიამ უარი უთხრა და მის ადგილზე გიორგი გიქოშვილი, ახალციხის მუნიციპალიტეტის გამგებლის ყოფილი მოადგილე დაინიშნა.

[თინათინ ზაზაძე, ახალციხე]