სასამართლომ ახალციხის გამგებლის წინააღმდეგ შეტანილი საჩივრის განხილვა შეწყვიტა

სასამართლო სხდომა დღეს, 24 აპრილს, ახალციხის რაიონულ სასამართლოში გაიმართა. ახალციხის მუნიციპალიტეტის გამგეობის ადმინისტრაციული სამსახურის ყოფილი სპეციალისტი ვეფხვია ხუციშვილი, ინდივიდუალური სამართლებრივი აქტის ბათილად ცნობასა და სამსახურში აღდგენას მოითხოვდა. მოპასუხე მხარემ, ახალციხის მუნიციპალიტეტის გამგეობიდან, რომელსაც იურიდიული სამსახურის უფროსი, ევა იველაშვილი წარმოადგენდა, მოსამართლე გიორგი ლონდარიძესთან შუამდგომლობა დააყენა და მოითხოვა საჩივარის განხილვის შეწყვეტა, რადგან მოსარჩელე მხარემ გასაჩივრების ვადები დაარღვია. მისი განმარტებით, ვეფხვია ხუციშვილს საჩივარი ერთი თვის ვადაში უნდა შეეტანა, თუმცა მან 4 დღის დაგვიანებით შეიტანა. ლონდარიძემ ამის გამო ადმინისტრაციული საქმის განხილვა შეწყვიტა.

ვეფხვია ხუციშვილი მომხდარში ადვოკატ ეკა აბაშიძეს ადანაშაულებს და ამბობს, რომ მან აბაშიძეს საჩივრის მოსამზადებლად 6 თებერვალს მიმართა: "ადვოკატმა დამაიმედა, რომ გასაჩივრებისთვის დრო ჯერ მქონდა“.

ეკა აბაშიძე განმარტავს, რომ ვეფხვია ხუციშვილის ინტერესებს ის არ იცავდა, მან მხოლოდ როგორც იურისტმა ხუციშვილს სარჩელი მოუმზადა: „საპრეტენზიო კომისიიდან მიღებული პასუხის შემდეგ სასამართლოში გასაჩივრებამდე ვადა ერთი თვე ჰქონდა. არ ვიცი პროცესზე რა მოხდა, ან ვადა საიდან აითვალეს. როცა ხუციშვილი სასამართლოს გადაწყვეტილებას ჩაიბარებს, სააპელაციოში გავასაჩივრებთ“.

ვეფხვია ხუციშვილმა საჯარო მოხელეთა შესარჩევ კონკურსში მესამე ეტაპი, გასაუბრება ვერ გაიარა. ხუციშვილი მომხდარში მუნიციპალიტეტის გამგებელს ზაზა მელიქიძეს ადანაშაულებს და ამიტომ სასამართლოში უჩივლა. მისი განმარტებით, მიზეზი მელიქიძესთან სამსახურებრივი დაპირისპირება გახდა.

„სამ მანქანაზე იყო გამოწერილი ნაწილები, სინამდვილეში ყველა ეს ნაწილი არ სჭირდებოდა ამ მანქანებს და მითხრეს, რაც მორჩება გავაკეთოთ მეოთხე მანქანაო. სამი იყო ტენდერში, მეოთხე არა. ამაზე პროფილაქტიკის ზედამხედველმა უარი თქვა, ტენდერში მანქანა თუ არ არის, მე ვერ გავარემონტებო და ეს საშარო საქმეაო. ზედამხედველი მივიყვანე გამგებელთან და მაშინ ზაზა მელქიძემ ყველაფერი უარყო, ასე არ მითქვამსო და გამომაგდო კაბინეტიდან, ეს იყო ჩვენი პირველი დაპირსპირება“, – იხსენებს ხუციშვილი.

[თინათინ ზაზაძე, ახალციხე]