ახალციხის გამგეობაში მუნიციპალიტეტის პრობლემებზე იმსჯელეს

ახალციხის მუნიციპალიტეტის 47 სოფლიდან „სოფლის მხარდაჭერის პროგრამა“ მხოლოდ აგარაში არ დასრულებულა. პროგრამის ფარგლებში სოფელში სასმელი წყლის პრობლემას აგვარებენ.

„სასმელი წყალი ბასეინამდე მოსულია და "სოფლის მხარდაჭერის პროგრამის" ფარგლებში გამოყოფილი თანხის გამოყენება დაქსელვაში უნდოდათ. მაგრამ, მოგეხსენებათ, რომ ყინვების გამო ახლა დაქსელვა ვერ დაიწყება, ამიტომ, ეს თანხა თუ დაგვრჩება და სამინისტრო უკან არ წაიღებს, გაზაფხულზე განხორციელდება დაქსელვა“, - განმარტავს ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე.

გარდა „სოფლის მხარდაჭერის პროგრამისა“ დღევანდელ თათბირზე ბესიკ ბლიაძე სოფლის გზებზე არსებული მდგომარეობითაც დაინტერესდა. რწმუნებულების თქმით, ყველა სოფელთან მისასვლელი გზა გახსნილია და დიდთოვლობას პრობლემა არცერთი მიმართულებით არ შეუქმნია. ანდრიაწმინდის რწმუნებულის თქმით, გარკვეულ მონაკვეთებზე გზა მოყინულია, რისთვისაც გამგეობას ტექნიკური მარილის გამოყოფა სთხოვა.

„გავეცანით რა მდგომარეობაა სოფლებში, სადმე დიდთოვლობის გამო პრობლემა ხომ არ შეიქმნა და ასე შემდეგ. როგორც რწმუნებულებმა თქვეს, გზა ჩაკეტილი არცერთ სოფელში არ არის, მხოლოდ პამაჯის მიმართულებით ქარის გამო პატარა პრობლემა შეიქმნა, მსუბუქ მანქანებს გადაადგილება უჭირთ, თუმცა, ესეც მოგვარდება“, - ამბობს ბესიკ ბლიაძე.

[თამარ თოთაძე, ახალციხე]