დიდთოვლობას მესხეთში სერიოზული პრობლემები არ გამოუწვევია

ამ ეტაპზე შეფერხებულია მოძრაობა ადიგენის მუნიციპალიტეტის რამდენიმე სოფელში. დერცელის, მოხეს, ღორთუბანისა და ზედა ზონის სოფლების მიმართულებით ავტომანქანებით გადაადგილება შეზღუდულია.

„დღეს დილით გავუშვით ტექნიკა და უკვე იწმინდება. აბასთუმანში, აღობილი და ზეკარის გზებზეც მუშაობენ. მოხე, დერცელი, ღორთუბანი და ზედა ზონის სოფლებში თოვლის საფარი დაახლოებით 60 სანტიმეტრზე მეტია, მაგრამ ამ დროისთვის იწმინდება და ძალიან მალე გაიხსნება“, - ამბობს ადიგენის მუნიციპალიტეტის გამგებლის მოვალეობის შემსრულებელი არსენ ბალახაშვილი.

რაც შეეხება ადიგენის შიდა გზებს, როგორც არსენ ბალახაშვილი განმარტავს, საგზაო დეპარტამენტი ემსახურება.

„დილით მქონდა მათთან საუბარი, როგორც მითხრეს უდე-არალს უკვე წმენდენ, შემდეგ უნდა ავიდეს უტყისუბანი და საერთაშორისო მომსახურების გზაზე, ზარზმის მონასტერთან“, - ამბობს არსენ ბალახაშვილი.

უამინდობის გამო ახალციხის მუნიციპალიტეტის სოფლებში ამ ეტაპზე შეფერხებები არ არის. როგორც სოფლის, ასევე ქალაქის ცენტრალურ ქუჩებზე გადაადგილება შეზღუდული არ არის. გამგებლის მოვალეობის შემსრულებლის ბესიკ ბლიაძის თქმით, ტექნიკურ მარილს ყველა პრობლემურ მონაკვეთზე დაყრიან.

„არის რამდენიმე სოფელი, რომელიც შედარებით მაღალმთიანია და აღმართიანი გზებია, იქ ცოტა პრობლემებია, ტრანსპორტს გადაადგილება უჭირს, თუმცა გზა ჩაკეტილი მაინც არაა. ტექნიკური მარილი დილიდან იყრება ქალაქის ცენტრალურ ქუჩებზე. გარდა ამისა, იმ ადგილებშიც დავყრით, სადაც პრობლემაა“, - ამბობს ბესიკ ბლიაძე.

დიდთოვლობის გამო გზებზე პრობლემები არ შექმნილა ბორჯომის მუნიციპალიტეტში. გამგებლის დიმიტრი ბერიძის თქმით, ქალაქის შიდა ქუჩებზე ტექნიკური მარილი იყრება.

„პირველი თოვლი რომ მოვიდა, გზებზე გარკვეული პრობლემები შეიქმნა, რაც რიკოთზე გზის ჩაკეტვამ გამოიწვია, მთლიანი ტექნიკა იქ მუშაობდა. პირველი ორი დღე შედარებით გაგვიჭირდა, მობილიზებულები არ ვიყავით ამხელა თოვლისთვის. პრობლემები როგორც ცენტრალურ მაგისტრალზე, ასევე შიდა ქუჩებზე გვქონდა, მაგრამ ამ მომენტისთვის, მობილიზებულები ვართ, მარილიც იყრება, თითქმის ყველა ქუჩა იწმინდება და არანაირი პრობლემა არ არის“, - ამბობს დიმიტრი ბერიძე.



[თამარ თოთაძე, ახალციხე]