ახალციხის ციხის კორონავირუსით ინფიცირებული თანამშრომელი თვითიზოლაციის წესებს არღვევს?!

ააიპ-ის თანამშრომლის კორონავირუსით ინფიცირების შესახებ 21 ოქტომბრის დილას გახდა ცნობილი. იგი იმავე დღეს ერთ–ერთ აფთიაქში იმყოფებოდა.

„ჩვენთან იყო 21 ოქტომბერს დღის მეორე ნახევარში, შენობაში თავად არ შემოსულა, კარზე დაგვიკაკუნა და ითხოვა, რომ გარეთ მოვმსახურებოდით, მოვემსახურეთ ყველა წესის დაცვით რა მედიკამენტიც უნდოდა მივაწოდეთ. თანხა ბარათით გადაიხდა და წავიდა. მას რა მდგომარეობა ქონდა ჯანმრთელობის არ ვიცი. შეიძლება თვითონაც არ იყო გარკვეული, ეს ჩვენი დასკვნა იყო რომ შეიძლება კოვიდინფიცირებული იყო“, – ამბობს აფთიაქის მენეჯერი.

იგივე პირი მეორე დღეს, 22 ოქტომბერს ქუჩაში მეზობელმა დაინახა.

„გუშინ დილით ვნახე, აქ იყო და როგორც ვიცი თბილისში აპირებდა წასვლას. აქვს თუ არა კორონავირუსი დადასტურებული ამას ვერ გეტყვით, ნამდვილად არ ვიცი. პირბადე სულ ეკეთა სამსახურში, სახლში, კიბეებზე“, – გვიყვება ინფიცირებულის მეზობელი.

რატომ გადაადგილდებოდა ააიპ-ის ინფიცირებული თანამშრომელი ქუჩაში და რატომ არ მოახდინა რეაგირება შესაბამისმა უწყებებმა, ან სად იმყოფება ახლა იგი, ჩვენთვის უცნობია, აღნიშნულ საკითხზე, "სამხრეთის კარიბჭემ" არაერთი მცდელობის მიუხედავად პასუხი ვერ მიიღო.

კომენტარს არ აკეთებენ ააიპ ახალციხის ციხისა და სამცხე-ჯავახეთის მხარის ადმინისტრაციაში. ჩვენს კითხვებს არ უპასუხა ახალციხის საზოგადოებრივი ჯანდაცვის ცენტრის ხელმძღვანელმა, ფატი ხაბულიანმაც.

„შვებულებაში ვარ და დეტალები არ ვიცი ნამდვილად, იმ დღეს [21 ოქტომბერს] დამირეკეს და მითხრეს ასეთი შემთხვევა მოხდაო. დეტალებზე მიმართეთ გუბერნიას და გიორგი მიქელაძეს", - განაცხადა ახალციხის ციხის დირექტორმა, დავით ტაბატაძემ.

სამცხე-ჯავახეთის სახელმწიფო რწმუნებულის აპარატის უფროსი, გიორგი მიქელაძე კი ამბობს, რომ კონკრეტულ პიროვნებაზე ინფორმაციას ვერ გასცემენ.

„პერსონალურ პირთან დაკავშირებით ვერ მოგაწოდებთ ინფორმაციას სად და როგორ იმყოფება, ამის უფლება არ გვაქვს. რაც შეეხება ზოგადად კოვიდინფიცირებულს, იგი არის შესაბამის სამედიცინო დაწესებულებაში, ან იმყოფება ბინაზე, ან კოვიდ სასტუმროში, ქუჩაში. კოვიდდადასტურებულის სიარული რა თქმა უნდა არ შეიძლება და არც მაქვს მსგავი ინფორმაცია, რომ ვინმე დადიოდეს ქუჩაში,“– ამბობს გიორგი მიქელაძე.

აღნიშნულ თემაზე არ საუბრობს თავად ინფიცირებულიც, "საქმე მაქვს" – გვითხრა და ტელეფონი გაგვითიშა.

როგორც ჩვენთვის ცნობილია ინფიცირებულია ახალციხის ციხის თანამშრომლის ოჯახის წევრებიც.



[ნუკა სტეფნაძე]