რეგიონში კოვიდინფიცირების 18 ახალი შემთხვევიდან უმრავლესობა ახალციხეშია

როგორც სამცხე-ჯავახეთის სახელმწიფო რწმუნებულის აპარატის უფროსი, გიორგი მიქელაძე განმარტავს, 18 ახალი შემთხვევიდან უმრავლესობის ინფიცირების წყარო ცნობილია: „ახალი ინფიცირებულები არის ძირითადად ძველი ინფიცირების კონტაქტები, კონკრეტულ შემთხვევებზე სიღრმეებში ვერ ვისაუბრებ“.

მიქელაძემ მედიასთან არც ის დააკონკრეტა მუნიციპალიტეტების რომელ სოფლებშია ახალი შემთხვევები გამოვლენილი. მან არ გასცა პასუხი ჟურნალისტების კითხვებს მედპერსონალის, პედაგოგებისა და მცირეწლოვანთა ინფიცირების შესახებ: „ეს მონაცემები ჩვენ გვაქვს, მაგრამ დაკონკრეტებისაგან თავს შევიკავებ, სიღრმეებში ვერ ჩავალ“, - განაცხადა მან.

რაც შეეხება ინფიცირებულთა გარდაცვალების სტატისტიკას, სახელმწიფო რწმუნებულის აპარატის უფროსი ამბობს, რომ მათ მონაცემებში გარდაცვალების მხოლოდ ერთი შემთხვევა ფიქსირდება, რომელიც ვალეს უკავშირდება და ინფორმაცია არ აქვთ 30 წლის ნინოწმინდელი ქალის გარდაცვალებაზე, რომლის შესახებაც დღეს, 21 ოქტომბერს დაავადებათა კონტროლის ეროვნული ცენტრის ხელმძღვანელმა ამირან გამყრელიძემ ისაუბრა.

„აღნიშნულთან დაკავშირებით კონკრეტული ინფორმაცია არ მაქვს, იქიდან გამომდინარე, რომ ეს არ დაფიქსირებულა არც ჩვენს რომელიმე კლინიკაში, არც მანამდე გვქონია და შესაბამისად, ვერ მოგაწვდით ინფორმაციას“.

ამ ეტაპზე რეგიონში:

კოვიდინფიცირებულია - 150 პირი;

გამოჯანმრთელდა - 39;

სახლში მკურნალობს - დაახლოებით 20;

თვითიზოლაციაშია - 627 პირი, აქედან:

ახალციხე - 346;
ახალქალაქი - 105;
ადიგენი - 60;
ასპინძა - 43;
ნინოწმინდა - 39;
ბორჯომი - 34;

საკარანტინო სივრცეებში - 551 პირია, მათგან:

ახალციხეში - 93;
ბაკურიანში - 458.

[თაკო ფეიქრიშვილი]