არალში კორონავირუსის პირველი შემთხვევა დაფიქსირდა

ინფიცირებულის მეუღლე, რომელიც არლის საჯარო სკოლაში ასწავლის ამბობს, რომ მის ოჯახის წევრს უდელ ექთანთან, 18 სექტემბერს ჰქონდა კონტაქტი, ექთანს კორონავირუსი 23 სექტემბერს დაუდასტურდა.

"სიცხე ჰქონდა სხვა სიმპტომებიც და ამიტომ გაუკეთეს კორონავირუსზე ტესტირება. მე გამიკეთეს ანალიზი და არ აღმომაჩნდა", – ამბობს ინფიცირებულის მეუღლე.

„სამხრეთის კარიბჭეს“ კითხვაზე რატომ არ იმყოფებოდა მეუღლესთან ერთად თვითიზოლაციაში და რატომ არ შეატყობინა სკოლის ადმინისტრაციას მომხდარის შესახებ, ასე გვპასუხობს: "არ ვიცი, არავინ ვიყავით თვითიზოლაციაში, რადგან ყველა კარგად ვიყავით".

არლის სკოლის დირექტორი, მარო ჩხიტუნიძე ამბობს, რომ თანამშრომლის მეუღლის კორონავირუსით ინფიცირების შესახებ დღეს შეიტყო. მისი თქმით, მასწავლებელს თანამშრომლებისთვის არ უთქვამს, რომ მის მეუღლეს კორონავირუსით ინფიცირებულთან ჰქონდა კონტაქტი.

„დღეს მომაწოდეს ინფორმაცია, რომ ჩვენი მასწავლებლის მეუღლეს კორონავირუსი დაუდასტურდა, იგი დღესაც სკოლაში იმყოფებოდა და გაკვეთილებს ატარებდა. მოვიქცევით ისე, როგორც ჯანდაცვის ცენტრი გადაწყვეტს“, – ამბობს არლის საჯარო სკოლის დირექტორი, მარო ჩხიტუნიძე.

დირექტორი ირწმუნება, რომ მასწავლებელი, რომლის მეუღლესაც კორონავირუსი აღმოაჩნდა, სკოლაში პირბადით დადიოდა და ჯანდაცვის სამინიტროს რეკომენდაციებს ასრულებდა: "პირბადე ეკეთა, ჩემთან სკოლაში ყველა თანამშრომელი იცავს რეკომენდაციებს".

"სამხრეთის კარიბჭე" დამატებითი ინფორმაციისთვის სამცხე–ჯავახეთის მხარის რწმუნებულის აპარატის ხელმძღვანელს, გიორგი მიქელაძეს დაუკავშირდა, თუმცა მან ჩვენს სატელეფონო ზარებს არ უპასუხა. რედაქციასთან კომენტარს არ აკეთებს ადიგენის საზოგადოებრივი ჯანდაცვის ცენტრის ხელმძღვანელი, რუიზან ქიმაძე.


[sknews.ge]