‘ადგილი არ გვაქვს’ - ახალციხის სამედიცინო დაწესებულებები ცხელებიან პაციენტებს ვეღარ იღებენ

ვალეში მცხოვრები 57 წლის კაცი ამბობს, რომ მეორე დღეა ტემპერატურა აქვს. დაუკავშირდა ოჯახის ექიმს, რომელმაც ურჩია, რომ საავადმყოფოში გადასულიყო. პირველად იგი ახალციხის რეფერალურ ჰოსპიტალში მივიდა, თუმცა მიღებაზე უარი უთხრეს. ასეთივე უარით გაისტუმრეს კლნიკა „იმედიდანაც“.

„ახლა კლინიკა „იმედთან“ ვდგავარ და არ ვიცი რა ვქნა. სასწრაფო არ მუშაობს ახალციხეში, საკუთარი მანქანით წამოვედი, ზემოთ საავადმყოფოში მივედი და ადგილი არ გვაქვსო, მერე „იმედში“ ჩამოვედი და აქაც ადგილი არ გვაქვსო. სიცხე მაქვს 37.5 საღამოობით უფრო მიწევს მაღლა.

უბნის ექიმმა მითხრა ჩადი ახალციხეში, გამოცხადდი ცხელების ცენტრშიო. ჩამოვედი და აქ ადგილი არ არის“, - განმარტავს ცხელებიანი კაცი „სამხრეთის კარიბჭესთან“.

კითხვაზე, ჰქონდა თუ არა შეხება ინფიცირებულთან ან რატომ ეჭვობს, რომ შესაძლოა კოვიდით იყოს ინფიცირებული, პასუხობს, რომ მისი სამუშაო ადგილიდან გამომდინარე რისკი მაღალია: „მე ისეთ ადგილზე ვმუშაობ რომ ათასი ადამიანი დადის, ბენზინგასამართ სადგურზე ვმუშაობ. არ ვარ დაზღვეული არაფრისგან. სხვა სიმპტომები არ მაქვს, მაგრამ მეორე დღეა სიცხე მაქვს, ხან ანტიბიოტიკი მივიღე, ხან დამწევი“.

არის თუ არა საავადმყოფოებში ცხელებიანი პაციენტებისთვის ადგილი, ამისი გარკვევა თავად სამედიცინო დაწესებულებებში ვცადეთ.

„არ გვაქვს ადგილი და ვერ მივიღებთ“, - განმარტა რეფერალური ჰოსპიტალის ხელმძღვანელმა რეზო კუჭუხიძემ.

იგივე პასუხი აქვთ კლინიკა „იმედში“: „ჩვენ ადგილები აღარ გვაქვს, სავსეა საავადმყოფო“, - განაცხადა კლინიკა „იმედის“ დირექტორმა გიორგი ბარძიმაძემ.

მოგვიანებით ბარძიმაძე „სამხრეთის კარიბჭეს“ თავად დაუკავშირდა და განმარტა, რომ შესაძლოა ადგილი გამოჩნდეს: „ახლა საავადმყოფო სავსეა, მაგრამ პაციენტების ანალიზების პასუხებს ველოდებით და მერე თუ გავიდა ხალხი, გვექნება ადგილი“.

როგორ უნდა მოიქცეს ცხელებიანი პირი, სანამ საავადმყოფოებში ადგილი გამოჩნდება, უცნობია.

[თაკო ფეიქრიშვილი]