ეროვნული გამოცდების პირველი სესია მთავრდება

ახალციხის საგამოცდო ცენტრში პირველ სესიაზე დარეგისტრირებული 208 აბიტურიენტიდან მხოლოდ 8 არ გამოცხადდა. პირველი გამოცდიდან პირველი აბიტურიენტი 10:40 საათზე გამოვიდა. მისი თქმით, გამოცდა რთული არ იყო.

ჯამში, ახალციხის საგამოცდო ცენტრში, რომელიც ერთ-ერთია საქართველოს მასშტაბით გახსნილი 17 საგამოცდო ცენტრიდან, 1024 აბიტურიენტი აბარებს.

2012 წლის ერთიან ეროვნულ გამოცდებზე რეგისტრაცია 8 საათზე, ქართული ენისა და ლიტერატურის გამოცდის პირველი სესია კი 9 საათზე დაიწყო.

ტრადიციულად აბიტურიენტებს, მხოლოდ საგამოცდო ბარათის, პირადობის დამადასტურებელი მოწმობისა და სასმელი წყლის შეტანა შეეძლოთ.

ქართული ენისა და ლიტერატურის გამოცდა 4 სესიად ჩატარდება. გამოცდის მეორე სესიისთვის რეგისტრაცია 14 საათზე დაიწყება, გამოცდა კი - 15 საათზე.

- “იმის გამო, რომ ჩვენთან მაგისტრანტების გამოცდები არ ბარდება, არის გამონაკლისი დღეები, როდესაც გამოცდა მხოლოდ ერთ სესიად ჩატარდება”,- ამბობს საგამოცდი ცენტრის ადმინისტრატორი გელა ინასარიძე.

რეგიონის მაშტაბით წელს ერთიან ეროვნულ გამოცდებზე 1024 ათასი აბიტურიენტი და გრანტის გაუმჯობესების მიზნით 57 სტუდენტი დარეგისტრირდა. 1237 პედაგოგი კი სასერთიფიკაციო გამოცდებისთვის ემზადება.

გელა ინასარიძის თქმით წინა წლებისგან განსხვავებით წელს მშობლებს გამოცდის პროცესის თვალყურის საშუალება აღარ აქვთ: “წელს საგამოცდო ცენტრებში ახალი, ციფრული კამერები დამონტაჟდა, რომელიც ტელევიზორის სისტემაზე არ მუშაობს. ამის გამო წელს მშობლებს შვილებისთვის თვალყურის დევნების საშუალება აღარ აქვთ”.

ასეთი ფორმატით ერთიანი ეროვნული გამოცდები წელს უკანასკნელად ტარდება. მომავალი წლიდან ახალი საგამოცდო მოდელი 8+1 ამოქმედდება.

ხვალ აბიტურიენტები გამოცდას ისევ ქართულ ენასა და ლიტერატურაში ჩააბარებენ, ისევ ორ სესიად.

[მანანა სარაშვილი, ახალციხე]