ახალციხის საგამოცდო ცენტრში ორი აბიტურიენტი არ გამოცხადდა

აბიტურიენტების რეგისტრაცია მთელი საქართველოს მასშტაბით დილის 8:00 საათზე დაიწყო. გამოცდა კი 9:00 საათზე. დღეს და ხვალ აბიტურიენტები გამოცდას ქართულ ენასა და ლიტეარატურაში აბარებენ. ახალციხეში საგამოცდო ცენტრი სამცხე-ჯავახეთის სახელმწიფო სასწავლო უნივერსიტეტის მეორე კორპუსშია განთავსებული. საგამოცდო ცენტრის ეზოში მობილიზებულია სახანძრო და სასწრაფო დახმარების სამსახურები. ასევე ადგილზე იმყოფებიან პოლიციელებიც.

„საგამოცდო პროცესი მშვიდ გარემოში მიმდინარეობს. არანაირი დარღვევა და ექსცესი არ ყოფილა“, - ამბობს ახალციხის საგამოცდო ცენტრის ხელმძღვანელი გელა ინასარიძე.

პირველი სესია ოთხი საათის განმავლობაში გრძელდება. ამ დროისთვის ახალციხის საგამოცდო ცენტრიდან ჯერ არცერთი აბიტურიენტი არ გამოსულა.

მეორე სესიისთვის აბიტურიენტების რეგისტრაცია 14:00 საათზე დაიწყება. ახალციხის საგამოცდო ცენტრში მეორე სესიაზეც 252 აბიტურიენტია დარეგისტრირებული.

ქართული ენისა და ლიტერატურის გამოცდა ორი დღის განმავლობაში ჩატარდება. ხვალ მესამე და მეოთხე სესია იქნება.


[თამარ თოთაძე, ახალციხე]