ერთიანი ეროვნული გამოცდები დაიწყო

ახალციხის საგამოცდო ცენტრის ხელმძღვანელის გელა ინასარიძის განმარტებით, საგამოცდო პროცესი მშვიდ ვითარებაში მიმდინარეობს.

აბიტურიენტებს რეგისტრაციის გასავლელად ერთი საათი ჰქონდათ. გამოცდა 09:00 საათზე დაიწყო.

"დაგვიანების შემთხვევა არ ყოფილა, გამოცდაზე რეგისტრირებული 241 აბიტურიენტიდან ცხრა არ გამოცხადდა. ერთი აბიტურიენტი გვყავს, რომელიც მხედველობადაქვეითებულია და იგი გაორმაგებული დროით ისარგებლებს", – ამბობს გელა ინსარიძე.

მისი თქმით, ყველა სექტორში ვენტილიატორებია დადგმული და აბიტურიენტებს სიცხე არ შეაწუხებთ.


შეგახსენებთ, რომ მოსალოდნელი მაღალი ტემპერატურის გამო, ერთიანი ეროვნული გამოცდების განრიგი შეიცვალა. გამოცდების ეროვნული ცენტრის ცნობით, იცვლება ქართული ენისა და ლიტერატურის გამოცდის, ასევე ზოგადი უნარების გამოცდის ჩატარების დრო.

ქართული ენისა და ლიტერატურის 2 და 3 ივლისისათვის დაგეგმილი მეორე სესია ჩატარდება 4 და 5 ივლისს, დილით. ანუ, აბიტურიენტები, რომლებიც ქართული ენისა და ლიტერატურის გამოცდაზე უნდა გამოცხადებულიყვნენ 2 ივლისს, 14:00 საათზე, ამ გამოცდას ჩააბარებენ იმავე საგამოცდო ცენტრში, 4 ივლისს, 08:00 საათზე (სესიისათვის რეგისტრაცია დაიწყება 08:00 საათზე, გამოცდა - 09:00 საათზე).

ქართული ენისა და ლიტერატურის გამოცდაზე 3 ივლისს, 14:00 საათზე განაწილებული აბიტურიენტები გამოცდას ჩააბარებენ 5 ივლისს, 08:00 საათზე (სესიისათვის რეგისტრაცია დაიწყება 08:00 საათზე, გამოცდა - 09:00 საათზე).

5 ივლისის ზოგადი უნარების გამოცდის პირველი და მეორე სესია ჩატარდება 7 ივლისს, ანალოგიური თანმიმდევრობით. ანუ, თუ აბიტურიენტი განაწილებული იყო 5 ივლისს 08:00 საათზე, იგი ზოგადი უნარების გამოცდას 7 ივლისს, 08:00 საათზე ჩააბარებს (სესიისათვის რეგისტრაცია დაიწყება 08:00 საათზე, გამოცდა - 09:00 საათზე), ხოლო თუ აბიტურიენტი განაწილებული იყო 5 ივლისს 14:00 საათზე, იგი გამოცდას ჩააბარებს 7 ივლისს 14:00 საათზე (სესიისათვის რეგისტრაცია დაიწყება 14:00 საათზე, გამოცდა 15:00 საათზე).


[თინათინ ზაზაძე, ახალციხე]