რა ქონებას ფლობს სამცხე-ჯავახეთის ახალი გუბერნატორი

ქონებრივი დეკლარაციის მიხედვით, რომელიც სამცხე-ჯავახეთის ახალ გუბერნატორს, მიმდინარე წლის 14 აგვისტოს აქვს შევსებული, გუბერნატორის ბინა თბილისში ჯავახიშვილის ქუჩაზე მდებარეობს.

დეკლარაციის მიხედვით, 39 წლის გუბერნატორის ოჯახის წევრების საკუთრებაში 10 000 ლარზე მეტი ღირებულების მოძრავი ქონება (ფასიანი ქაღალდების, საბანკო ანგარიშების ან/და შენატანის, ნაღდი ფულადი თანხის გარდა) არ არის. არც გუბერნატორი და არც მისი ოჯახის წევრები ფასიან ქაღალდებს ფლობენ .

დეკლარაციის მიხედვით, მაჭუტაძეს იმ დროისთვის სახელფასო ანგარიშზე თანხა არ ჰქონდა. რაც შეეხება ნაღდ ფულს, იმ დროისათვის მას ნაღდი ფულადი თანხის სახით 5 000 ლარი ჰქონდა.

ამ დროისთვის უცნობია, რა ანაზღაურება აქვს მას მიღებული გუბერნატორად დანიშვნამდე დაკავებული თანამდებობიდან. დეკლარაციის მიხედვით, ცნობილია 2012 წლის განმავლობაში გამომუშავებული თანხის ოდენობა. მაჭუტაძემ, როგორც საქართველოს ფინანსთა სამინისტროს შემოსავლების სამსახურის საბაჟო დეპარტამენტის სამმართველოს უფროსმა 2012 წელი 58 150 ლარი შემოსავალი მიიღო.

აღნიშნულ პერიოდში (2012 წლის განმავლობაში ) მას ან მისი ოჯახის წევრს 500 ლარზე მეტი ღირებულების ფასიანი საჩუქარი მიღებული არ აქვს. ასევე აღნიშნულ პერიოდში მაჭუტაძეს მანქანის გაყიდვით მიღებული აქვს 2 000 დოლარი.

შეგახსენებთ, აკაკი მაჭუტაძე სამცხე-ჯავახეთის გუბერნატორად დღეს, 13 დეკემბერს დაინიშნა.

[ნინო ნარიმანიშვილი, ახალციხე]