რა ქონებას ფლობს სამცხე–ჯავახეთის ახალი გუბერნატორი ბესიკ ამირანაშვილი

ფოტო:ნეტგაზეთი

ბესიკ ამირანაშვილმა ქონებრივი დეკლარაცია 2018 წლის 26 ივლისს შეავსო.

ამირანაშვილმა 2018 წელს, იმერეთის რაჭა–ლეჩხუმისა და ქვემო სვანეთის პოლიციის დეპარტამენტის დირექტორის პოზიციაზე ყოფნის დროს მცხეთაში, სოფელ კოტორაანთკარში ორი მიწის ნაკვეთი შეიძინა, ერთი ნაკვეთის ფართობია 595 კვ.მეტრი, ხოლო მეორე ნაკვეთის 600 კვ.მეტრი ორივე ნაკვეთში ჯამში 10 000 დოლარი გადაიხადა.

დეკლარაციის მიხედვით, ბესიკ ამირანაშვილის სახელზეა თბილისში, ბახტრიონისა და ფანასკერტელის ქუჩების მიმდებარე ფერდობზე 106,53 კვ.მეტრი ფართის ბინა და 19,2 კვ.მეტრი ავტოფარეხი. ამირანაშვილმა 2014 წელს ბინა 65 000 დოლარად, ავტოფარეხი კი 5 000 დოლარად შეიძინა.

სამცხე–ჯავახეთის ახალი გუბერნატორი 25%–იანი წლის მფლობელია მცხეთაში, სოფელ გალავანში მდებარე აგარაკის ( 2500 კვ.მ) და ორი მიწის ნაკვეთის (5200 კვ.მ და 1600 კვ.მ), რომელიც მემკვიდრეობის სახით 2005 წელს გადაეცა.

დეკლარაციის შევსების დროს ბესიკ ამირანაშვილს „საქართველოს ბანკში“ სახელფასო ანგარიშზე 3 000 ლარი უფიქსირდება.

ბესიკ ამირანაშვილმა შსს–ს პირველ მოადგილედ მუშაობის დროს, 2017 წლის 1 იანვრიდან 9 ივნისამდე ხელფასის სახით აიღო 65 543 ლარი.

ამავე წლის 16–დან 18 ნოემბრამდე, შსს ობიექტების დაცვის დეპარტამენტის პირადი დაცვის სპეციალური სამმართველოს პირველი განყოფილების უფროსის პოზიციაზე ყოფნის დროს მიიღო 140 ლარი.

2017 წლის 18 ნომებრიდან 31 დეკემბრამდე შსს იმერეთის, რაჭალეჩხუმისა და ქვემო სვანეთის პოლიციის დეპარტამენტის დირექტორის პოზიციაზე ყოფნისას ხელფასის სახით დაერციხა 9 244 ლარი.

ბესიკ ამირანაშვილს 2015 წლის 4 ნოემბერს აღებული აქვს სამომხმარებლო სესხი „საქართველოს ბანკიდან“ 8 500 დოლარი, წინა წლის პირველი იანვრიდან 31 დეკემბრის ჩათვლით გადაიხადა 2 265 დოლარი. სესხი 2020 წლამდე უნდა დაფაროს.

ასევე მას, 2014 წლის 29 ივლისს აღებული აქვს იპოთეკური სესხი იმავე ბანკიდან 35 607 დოლარის ოდენობით, წინა წლის პირველი იანვრიდან 31 დეკემბრის ჩათვლით გადახდილი აქვს 6 998 დოლარი. აღნიშნული სესხი ამირანაშვილმა 2018 წლის 1 აგვისტოს დაფარა.

შეგახსენებთ, რომ ბესიკ ამირანაშვილი სამცხე–ჯავახეთის გუბერნატორად პრემიერ–მინისტრმა მამუკა ბახტაძემ დღეს, 20 აგვისტოს წარადგინა.

[თინათინ ზაზაძე, ახალციხე]