სამი მიწის ნაკვეთი და ერთი ბინა – რა იყიდა კალანდაძემ რეგიონში მუშაობისას

თეიმურაზ კალანდაძე სამცხე–ჯავახეთის პოლიციის დეპარტამენტის უფროსად 4 წელი მუშაობდა. იგი ამ პოზიციაზე 2013 წლის 26 ნოემბერს დაინიშნა. კალანდაძე მაშინ რეგიონში მცხეთის რაინული სამმართველოდან გადმოიყვანეს, სადაც, ასევე უფროსის პოზიცია ეკავა.

2014 წელს შევსებული დეკლარაციის მიხედვით, თეიმურაზ კალანდაძე არ ფლობს რაიმე ტიპის კერძო საკუთრებას, ბინას ან მიწის ნაკვეთს.

ამ დეკლარაციის მიხედვით, ორი ბინა და ორი არასაცხოვრებელი ფართი ფიქსირდება კალანდაძის ოჯახის წევრებზე, მამასა და დედაზე.

მამა, გიორგი კალანდაძე, არასაცხოვრებელ ფართებს ფლობს, თბილისში, ჭოველიძის ქუჩაზე, N27-ში, მოცულობით – 11.37
კვ.მ და ამავე ქუჩაზე, N24-ში, მოცულობით – 75.84 კვ.მ

რაც შეეხება ბინებს, მამა, გიორგი კალანდაძე ფლობს ასევე ჭოველიძის ქუჩაზე, იქ სადაც არასაცხოვრებელ ფართი აქვს, ბინას, რომლის მოცულობა 77.05 კვ.მ–ია. დედის, კარინე კალანდაძის სახელზეა რეგისტრირებული გლდანში, მე-18 კორპუსში, 66.15 კვ.მ საცხოვრებელი ფართი.

სამცხე–ჯავახეთში მუშაობის დაწყებიდან ერთი წლის შემდეგ, 2015 წელს, თეიმურაზ კალანდაძემ დუშეთში, სოფელ ილტოზაში შეიძინა მიწის ნაკვეთი, რომლის ფართობია - 1200.00 კვ.მ

2016 წელს კალანდაძემ კიდევ ერთი მიწის ნაკვეთი იყიდა, – დაბა ბაკურიანში, „დიდველზე“, 1079.50 კვ.მ.

2017 წელს შევსებული დეკლარაციის მიხედვით, თეიმურაზ კალანდაძის სახელზე არსებულ მიწის ნაკვეთებს კიდევ ერთი ემატება, ბორჯომში, სადგერში, 400,00 კვ.მ. ამავე დეკლარაციის მიხედვით, იგი ფლობს ბინას ბათუმში, ტბელ აბუსელის N51–ში, 47,50 კვ.მ ფართით, რომლის ღირებულება 14200 დოლარია.

დეკლარაციების მიხედვით ირკვევა, რომ თეიმურაზ კალანდაძის წლიური შემოსავალი, 60 000 ლარია. 16 000 ლარი წლიური შემოსავალი აქვს მამას, გიორგი კალანდაძეს, რომელიც საქართველოს სახელმწიფო უსაფრთხოების სამსახურის ანტიკორუფციული სააგენტოს მართვისა და კონტროლის განყოფილების უფროსია. 2014 წლის დეკლარაციაში მამის ეს სამსახური და შემოსავალი მითითებული არ არის. ეს მონაცემი 2015 წლის იანვარში შევსებული დეკლარაციიდან ჩნდება. ამავე წლის დეკლარაციიდან ჩნდება დის, ქეთევან კალანდაძის შემოსავალი, წელიწადში დაახლოებით 12 000 ლარამდე. იგი საქართველოს სასჯელაღსრულებისა და პრობაციის სამინისტროში სპეციალური აღრიცხვის სამმართველოს ინსპექტორია.

2016 წელს შევსებული დეკლარაციის მიხედვით, თეიმურაზ კალანდაძეს აქვს ორი სესხი საქართველოს ბანკში – სამწლიანი (01/04/2015 - 01/10/2018) 45000 ლარი; და, ხუთწლიანი (27/05/2011 - 27/10/2016) – 14 100 დოლარი.

2017 წლის დეკლარაციის მიხედვით, კი, რეგიონის პოლიციის ყოფილ უფროსს, 31 000 დოლარი, ათწლიანი (14.11.2016-01.12.2026) იპოთეკური სესხი აქვს.

შეგახსენებთ, თეიმურაზ კალანდაძე სამცხე–ჯავახეთის პოლიციის დეპარტამენტის უფროსად ოთხი წლის განმავლობაში მუშაობდა. მან პოზიცია 2017 წლის 2 აგვისტოს დატოვა. იგი თბილისში გლდანი–ნაძალადევის სამმართველოს უფროსად გადაიყვანეს.

[თამუნა უჩიძე, ახალციხე]