სამცხე-ჯავახეთის გუბერნატორად აკაკი მაჭუტაძე დაინიშნა

საქართველოს 9 რეგიონში გუბერნატორები საქართველოს პრემიერ მინისტრმა ირაკლი ღარიბაშვილმა, დღეს, 13 დეკემბერს, 15:00 საათზე წარადგინა.

აკაკი მაჭუტაძეს ამ დრომდე საქართველოს შინაგან საქმეთა სამინისტროს, სახელმწიფო უსაფრთხოების სააგენტოს (დეპარტამენტი) სამცხე-ჯავახეთის რეგიონალური სამმართველოს უფროსის პოსტი ეკავა. ჰყავს მეუღლე და ორი შვილი. დაბადებულია თბილისში, 1974 წლის 11 მარტს.

"არის საგარეო-ეკონომიკური მიმართულების სპეციალისტი, აქვს სამართალდამცავ ორგანოებში და საფინანსო ორგანოებში მუშაობის გამოცდილება. არის ძალიან პატრიოტი კაცი და ძალიან კარგი მენეჯერი", - ასე დაახასიათა პრემიერმა სამცხე-ჯავახეთის ახალი გუბერნატორი.

რაც შეეხება დანარჩენ რეგიონებს, ქვემო ქართლში ეს პოსტი პროფესიით იურისტმა გიორგი მღებრიშვილმა დაიკავა, რაჭა-ლეჩხუმში ეკონომისტმა პაპუნა მარგველიძემ, სამეგრელოში სამხარეო პოლიციის ყოფილმა უფროსმა ლევან შონიამ, იმერეთში ინჟინერ-ტექნოლოგმა ზაზა მეფარიშვილმა, კახეთში ყოფილმა გამგებელმა ირაკლი შიოლაშვილმა, მცხეთა მთიანეთში ნუგზარ ყიფიანმა, შიდა ქართლში ზურაბ რუსიშვილმა, გურიაში გიორგი ჩხაიძემ.

"იმედი მაქვს, რომ დაკისრებულ მოვალეობას ღირსეულად შეასრულებთ. თქვენზე არის ძალიან დიდი პასუხისმგებლობა, რომ რეგიონში დაწყებული პროექტები განხორციელდეს წარმატებით და დროულად და არ იყოს ჩამორჩენა. ადგილზე გაეცნოთ რეგიონის პრობლემებს და რაც მთავარია, მოსახლეობის პრობლემებს. დღევანდელი მთავრობა არის მოსახლოებაზე ორიენტირებული მთავრობა, ჩვენი ამოსავალი არის ადამიანი, თითოეული მოსახლე. შესაბამისად, ჩემი მოწოდებაა 24-საათიან რეჟიმში ვიმუშაოთ", - მიმართა გუბერნატორებს ირაკლი ღარიბაშვილმა.

შეგახსენებთ, სამცხე-ჯავახეთში ყოფილმა სახელმწიფო-რწმუნებულმა, გუბერნატორმა ივანე წიკლაურმა გადადგომის შესახებ განცხადება საპრეზიდენტო არჩევნებიდან მეორე დღეს, 28 ოქტომბერს დაწერა. მისი განცხადება 15 ნოემბერს დაკმაყოფილდა. ამ დრომდე რწმუნებულის მოვალეობას ყოფილი რწმუნებულის პირველი მოადგილე ჰარუთიუნ ჰოვჰანესიანი ასრულებს.

პრემიერ-მინიტრმა დღესვე მთავრობის კანცელარიის რეგიონებთან და ადგილობრივ თვითთმართველობის ორგანოებთან ურთიერთობის დეპარტანეტის ახალი უფროსი - აკაკი ჩხენკელიც წარადგინა. ამ პოსტზე მან ირაკლი მელაშვილი შეცვალა.

[ნინო ნარიმანიშვილი, ახალციხე]