ბორჯომის საკრებულოს თავმჯდომარის ქონება და ხელფასები

ზაზა ჩაჩანიძე პოლიტიკაში 2012 წელს გამოჩნდა, მას შემდეგ, რაც ხელისუფლებაში „ქართული ოცნება“ მოვიდა. იგი ბორჯომის საკრებულოს ხელმძღვნელობდა წინა, 2014 წლის თვითმმარველობის არჩევნების შემდეგაც.

პოლიტიკაში გამოჩენის შემდეგ შევსებული პირველი და ბოლო, 2014 და 2017 წლების დეკლარაციების მიხედვით, ზაზა ჩაჩანიძეს აქვს სამი ბინა და ერთი ავტოფარეხი თბილისში და 25%–იანი წილი ბორჯომში მდებარე საცხოვრებელ სახლში.

დეკლარაციის მიხედვით, ჩაჩანიძის ოჯახი თბილისში, ფალიაშვილის ქუჩაზე, 66 კვ.მ–ს, 2001 წლიდან ფლობს. 2006 წლიდან მათ უძრავ ქონებას დედაქალაქში კიდევ ერთი 187, 5 კვ.მ. ფართის ბინა და ავტოფარეხი ემატება. მესამე სახლს თბილისში, ასევე ჭავჭავაძის ქუჩაზე, 78.65 კვ.მ–ს, ზაზა ჩაჩანიძე, 2013 წელს ყიდულობს.

ამ უძრავი ქონებიდან, 2017 წლამდე, ზაზა ჩაჩანიძის სახელზე მხოლოდ ფალიაშვილის ქუჩის ბინა და ბორჯომის სახლი იყო რეგისტრირებული, ყველა დანარჩენის 100%–იან წილს, მისი მეუღლე, ქეთევან ლომიძე ფლობდა. 2017 წელს შევსებულ დეკლარაციაში, უკვე, ყველა ბინის მფლობელი ზაზა ჩაჩანიძეა.

„ეს ოდითგანვე ოჯახის ქონებაა. ის ბინები ისევ მეუღლის სახელზეა, შესაძლოა შეცდომითაა დეკლარაციაში. რა მნიშვნელობა აქვს, ოჯახის საკუთრებაა“, – გვიხსნის ზაზა ჩაჩანიძე სატელეფონო საუბარში.

2017 წლის დეკლარაციის მიხედვით,ბორჯომის საკრებულოს თავმჯდომარე 2012 წლის CHEVROLET CAPTIVA-თი გადაადგილდება. ეს მანქანა, წინა დეკლარაციების მიხედვით, გასულ წლამდე შვილის, ირაკლი ჩაჩანიძის საკუთრება იყო.

პოლიტიკაში მოსვლისას შევსებულ ამ ორ, პირველ და ბოლო დეკლარაციას თუ შევადარებთ, ზაზა ჩაჩანიძის ქონება მნიშვნელოვნად არც ფულადი დანაზოგებით გაზრდილა.

2014 წლის დეკლარაციის მიხედვით, ზაზა ჩაჩანიძეს თი–ბი–სი ბანკში, სახელფასო ანგარიშზე აქვს 561 ლარი, ასევე, დანაზოგი 10 000 დოლარი. 10 000 ლარია მისი მეუღლის ანგარიშძე.

ბოლო ქონებრივი დეკლარაციის მიხედვით, საკრებულოს თავმდჯომარეს აქვს 300 ლარი სახელფასო ანგარიშზე და 14 500 დოლარი დანაზოგი.
საკრებულოს თავმჯდომარეობამდე, 2011 წლის მაისიდან 2014 წლის მაისამდე, ზაზა ჩაჩანიძე შპს „არტგრუპდინასტის“ დირექტორი იყო. 2013 წელს, ამ კომპანიიდან, ხელფასის სახით 7 500 ლარი მიიღო.

როგორც საკრებულოს თავმჯდომარეს, დეკლარაციების მიხედვით, ზაზა ჩაჩანიძეს 2014 წელს აღებული აქვს – 21 528 ლარი; 2015 წელს – 40 450 ლარი, ხოლო, 2016 წელს – 37 100 ლარი.

ქონებრივი დეკლარაციიდან ირკვევა, რომ ჩაჩანიძეებს ფალიაშვილის ქუჩაზე მდებარე ბინა გაქირავებული აქვთ. იჯარის სახით, 2016 წელს, ოჯახს 21 664 ლარი აქვს აღებული. ბოლო დეკლარაციის მიხედვით, ქეთევან ლომიძეს თი–ბი–სი ბანკში აქვს სესხი – 10 472 დოლარი.

[ნინო ნარიმანიშვილი, ბორჯომი]