პრეზიდენტი პარლამენტს ყოველწლიური მოხსენებით მიმართავს

საქართველოს პრეზიდენტის მოხსენებას პარლამენტში, 14:00 საათზე მოისმენენ. პრეზიდენტის საპარლამენტო მდივნის, გიორგი კვერენჩხილაძის განმარტებით, მოხსენების შინაარსი შეეხება ქვეყნის მდგომარეობის უმნიშვნელოვანეს საკითხებს, იქნება ეს საშინაო თუ საგარეო პოლიტიკასთან დაკავშირებული თემატიკა.

როგორც გუშინ გამართულ ბიუროს სხდომაზე გადაწყდა, პრეზიდენტის მოხსენების შემდეგ, საპარლამენტო განხილვა ფრაქციების ხელმძღვანელების გამოსვლის რეჟიმში გაგრძელდება. ასევე გადაწყდა, რომ თითოეული ფრაქციის გამოსვლის ხანგრძლივობა იქნება 15 წუთი. სულ პარლამენტში 12 ფრაქციაა დარეგისტრირებული.

ქვეყნის მდგომარეობის უმნიშვნელოვანეს საკითხებთან დაკავშირებით, წელიწადში ერთხელ, პრეზიდენტის პარლამენტის წინაშე გამოსვლას საქართველოს კონსტიტუცია ითვალისწინებს. პარლამენტის რეგლამენტის მიხედვით კი, ეს საგაზაფხულო სესიის პლენარული სხდომების პირველ დღეს ხდება.

უკვე ცნობილია, რომ პრეზიდენტის გამოსვლას მინისტრთა კაბინეტიც დაესწრება. გიორგი მარგველაშვილის ანგარიშს პრემიერ-მინისტრი გიორგი კვირიკაშვილიც მოისმენს.

ეს არის პირველი შემთხვევა, როდესაც საკანონმდებლო ორგანოში საქართველოს პრეზიდენტ გიორგი მარგველაშვილის გამოსვლას მთავრობის წევრები დაესწრებიან.

[ნინო ნარიმანიშვილი, ახალციხე]