სოფელ აწყურის უბნის ექიმის ლია ზედგინიძის განმარტებით, ახალგაზრდა მამაკაცს მისთვის არ მიუმართავს: „როგორც კი თავი ცუდად ირგძნო, ახალციხეში, „იმედის კლინიკაში“ მივიდა. მაღალი ტემპერატურა ჰქონდა, გადასხმა გაიკეთა, თავი უკეთ იგრძნო და მიუხედავად კლინიკის მოთხოვნისა, საავადმყოფოში არ დარჩა. უარი თქვა მკურნალობაზე, სახლში დააყოვნა 2 დღე. ამასობაში ისევ ცუდად გახდა და თბილისში გადაიყვანეს“.
კლინიკა "იმედში" ამბობენ, რომ ახალგაზრდა მამაკაცი მათთან 6 თებერვალს მივიდა და 8 თებერვალს ნანა კვანტალიანის რეანიმაციულ ცენტრში გააგზავნეს.
"ჩემთან ერთხელ იყო, მაგრამ 2 დღით ადრე ინფექციური თერაპიის ჩასატარებლად კლინიკაში შემოსულია. მარჯვენა ფილტვის ანთება ჰქონდა, სიცხე და ხველება აღენიშნებოდა, დაენიშნა მკურნალობა, თუმცა მალევე დამძიმდა და თბილისში გადავაგზავნეთ", – ამბობს კლინიკა „იმედის“ ექიმი დავით ბაშარული
თბილისის სამედიცინო დაწესებულებაში, მამაკაცი რამდენიმე დღის განმავლობაში იწვა. 34 წლის ა.დ. საავადმყოფოში, გუშინ, 15 თებერვალს გარდაიცვალა.
სოფელ აწყურში ახალციხის მუნიციპალიტეტის გამგებლის წარმომადგენლის ელგუჯა ჯვარიძის განმარტებით, გარდაცვლილი სოფელში უკვე ჩამოასვენეს. მისივე თქმით, სოფელში ამბობენ, რომ მამაკაცს ვირუსული ინფექცია H1N1 ჰქონდა: „გაცივდა ადამიანი, სახლში იყო და გვიან მივიდა ექიმთან. ღორის გრიპი იყოო, ამბობენ სოფელში“.
თუმცა, როგორც უბნის ექიმი ლია ზედგინიძე ამბობს, ახალგაზრდა მამაკაცის გარდაცვალების მიზეზი ამ ეტაპზე უცნობია: „ფორმა –100 ჩემამდე არ მოსულა, ოფიციალურად არც საავადმყოფოს და არც პაციენტს არ მოუმართავს“.
გარდაცვალების ოფიციალური მიზეზი ჯერ უცნობია ახალციხის საზოგადოებრივი ჯანდაცვის ცენტრისთვისაც.
გახდა თუ არა გარდაცვალების მიზეზი H1N1 „სამხრეთის კარიბჭემ“ გადამოწმება ჯანდაცვის სამინისტროში სცადა. ჯანდაცვის სამინისტრომ დაავადებათა კონტროლის ეროვნულ ცენტრში გადაგვამისამართა. დაავადებათა კონტროლის ეროვნულ ცენტრში კი განაცხადეს, რომ მათ მსგავსი ინფორმაცია არ აქვთ.
„ლაბორატორიულად თუ არ დადასტურდა, ვერაფერს გეტყვით. თუ დადასტურდება, ამ ინფორმაციას განვათავსებთ ჩვენს ვებგვერდზე. თუ არ არის დადასტურებული, არ აქვთ უფლება თქვან, რომ ეს არის ღორის გრიპი“, – განგვიცხადეს დაავადებათა კონტროლის ეროვნული ცენტრის საზოგადოებასთან ურთიერთობის სამსახურში.
ამ დროისთვის ცნობილია ის, რომ ვირუსული ინფექციით გარდაცვლილის ოჯახის კიდევ ორი წევრი მკურნალობს. ახალგაზრდა მამაკაცის მამა და და სამედიცინო დაწესებულება „უნიმედი სამცხეში“ გადიან სამკურნალო კურსს.
"უნიმედი სამცხეს" დირექტორის ელდარ ალიევის განმარტებით, ორივე პაციენტს პნევმონია აქვს: "მდგომარეობა სტაბილურია, გადიან მკურნალობის კურსს, არ ვიცით როდის გავწერთ ბინაზე. რაც ეს ამბავი გაიგეს, შეშფოთებულები არიან, შიშის ფაქტორი უფრო მოქმედებს".
მისივე თქმით, ბოლო პერიოდში, "უნიმედი სამცხეში" იმატა პაციენტების მიმართიანობამ გრიპისა და მწვავე რესპირატორულ დაავადებათა სიმპტომებით: "რამდენიმე პალატის დამატებაც დაგვჭირდა".
რამდენ ადამიანს აქვს ლაბორატორიულად დადასტურებული H1N1, მაგალითად, ახალციხეში, ახალციხის საზოაგადოებრივი ჯანდაცვის ცენტრის ხელმძღვანელის, ფატი ხაბულიანის განმარტებით, ამ ეტაპზე ოფიციალური სტატისტიკა არ არსებობს: "მე ასეთი ოფიციალური, დადასტურებული მონაცემები არ მაქვს, მაგრამ, ქვეყანაში ცირკულირებს ეს ინფექცია და ჩვენთანაც ექნებათ პაციენტებს".
[ვარლამ წიკლაური, ნინო ნარიმანიშვილი, ახალციხე]