ახალციხის კლინიკებში პაციენტების მიმართვიანობამ უმნიშვნელოდ იმატა

„უნიმედი სამცხეში“ განმარტავენ, რომ ბოლო დღეებში გრიპის მაგვარი დაავადებების სიმპტომებით პაციენტების მიმართვიანობამ დაახლოებით 10 პროცენტით იმატა. თუმცა, ეს არ ნიშნავს, რომ ყველა პაციენტი სამკურალოდ საავადმყოფოში დატოვეს, უმეტესობა მკურნალობას სახლში აგრძელებს, სტაციონარში მცირე ნაწილი რჩება.

მიმართვიანობამ მოიმატა კლინიკა „იმედშიც“, თუმცა, ექიმების განმარტებით ამ ეტაპზე რეგიონში გრიპისმაგვარი დაავადებების მხრივ საგანგაშო მდგომარეობა არ არის.

სამცხე-ჯავახეთის საზოგადოებრივი ჯანდაცვის ცენტრის ხელმძღვანელის ფატი ხაბულიანის განმარტებით, ამ ეტაპზე რეგიონში H1N1 ვირუსი არ დაფიქსირებულა: „ყოველი კვირის ბოლოს კლინიკებიდან ვიღებთ მონაცემებს, მსგავსი შემთხვევა ამ დრომდე არ გვქონია“.

შეგახსენებთ, საქართველოში H1N1-ის ვირუსია გავრცელებული, თუმცა, ჯანდაცვის სამინისტროს ინფორმაციით, გრიპის გავრცელების ინტენსივობა ეპიდემიოლოგიურ ზღურბლს არ აჭარბებს. ამ ეტაპზე საქართველოში დაახლოებით 9000-მდე ადამიანია ინფიცირებული H1N1 ვირუსით, გარდაიცვალა სამი ადამიანი.

გრიპის ვირუსების გამო ჯანდაცვის სამინისტრო მუშაობის საგანგებო რეჟიმზეა გადასული. სასწრაფო –სამედიცინო დახმარების სამსახურებთან ერთად, ამოქმედებულია ცენტრები, ოჯახის ექიმის 24–საათიანი მომსახურებით. ამ ეტაპზე მსგავსი მხოლოდ ორი ცენტრი ამოქმედდა, ორივე ქვეყნის დედაქალაქში. რეგიონებში კი მუშაობის საგანგებო რეჟიმზე სასწრაფო დახმარების სამსახური გადავიდა. გარდა ამისა, სამინისტროსგან რეკომენდაციები აქვს მიღებული ყველა სამედიცინო დაწესებულებას.

ეპიდემიის ასაცილებლად სპეციალური რეკომენდაციები გასცა დაავადებათა კონტროლის ეროვნულმა ცენტრმა. ეს რეკომენდაციები, თავის მხრივ, განათლების სამინისტრომ ყველა საგანმანათლებლო დაწესებულებას გადაუგზავნა.

რეკომენდაციების თანახმად, გრიპისმაგვარი დაავადების სიმპტომების მქონე პირები არ უნდა დაიშვან დაწესებულებებში; სასწავლო და სააღმზრდელო სივრცეში უნდა გააქტიურდეს განიავების რეჟიმი ყოველი შესვენებისას; სისტემატურად უნდა მოხდეს სველი წესით დალაგება; გამკაცრდეს ხელების ჰიგიენის წესების დაცვის მონიტორინგი და საინფორმაციო აქტივობები.

სამცხე–ჯავახეთის სკლებსა და ბაღებში ამ ეტაპზე სწავლა არსად შეჩერებულა. პრევენციის მიზნით, რეგიონის სასწავლო და სააღმზრდელო დაწესებულებებში ყველა ოთახს სპეციალური სადეზინფექციო ხსნარებით ამუშავებენ.

[თინათინ ზაზაძე, ახალციხე]