მასწავლებლებს რომლებიც აჭარაში იმყოფებოდნენ COVID-19-ზე შეამოწმებენ

ტესტირებასთან დაკავშირებით მასწავლებლებს მოკლე ტექსტურ შეტყობინებებს გაუგზავნიან.

„ვიწყებთ გაფართოვებულ კვლევას, დაახლოებით 2 100–მდე მასწავლებელია ამ ზაფხულს აჭარის სანაპიროზე ნამყოფი. ყველა აღრიცხული გვყავს, ყველას გაეგზავნა შესაბამისი ინფორმაციები, ყველა მუნიციპალიტეტის საზოგადოებრივი ჯანდაცვის ცენტრს აქვს სია, აქტიურად ვთანამშრომლობთ განათლების სამინისტროსთნაც“, – განაცხადა ამირან გამყრელიძემ.

გამყრელიძის განმარტებით, აღნიშნული ქმედება პრევენციაა იმისა, რომ სკოლებში ინფიცირების შეტანა არ მოხდეს.

„მასწავლებლები ჩვენი სტრატეგიული ჯგუფია და სკოლის დაწყებამდე აუცილებელია მათთან შესაბამისი ზედამხედველობა. შემუშავებულია ასევე სტრატეგია 45 000 მასწავლებლის რენდომული გამოკვლევის, რათა დარწმუნებული ვიყოთ, როცა მასწავლებელი სკოლაში შევა ის არ იყოს ინფიცირების სტადიაში“, – აღნიშნა გამყრელიძემ.

პრემიერ–მინისტრის გიორგი გახარიას განცხადებით, სასწავლო წლის დაწყება სკოლებსა და უნივერსიტეტებში საქართველოს ექვს დიდ ქალაქში ოქტომბრამდე გადაიდო.

[ნუკა სტეფნაძე]