'უხერხულობას ქმნის, მაგრამ ხაბულიანს ვერ გავათავისუფლებთ'– გამყრელიძე [ვიდეო]

ახალციხის საზოგადოებრივი ჯანდაცვის ცენტრის ხელმძღვანელის ფატი (ნაირა) ხაბულიანისა და მისი შვილის, დაავადებათა კონტროლის ეროვნული ცენტრის რეგიონული განყოფილების უფროსის, ნინო ზედგინიძის შესახებ, ამირან გამყრელიძემ „სამხრეთის კარიბჭესთან“ კომენტარი გააკეთა.

კითხვაზე, არის თუ არა კანონდარღვევა ის, რომ ხაბულიანი ერთდროულად რამდენიმე ანაზღაურებად საქმიანობას ითავსებს, კერძოდ, ცენტრის ხელმძღვანელობის გარდა, „ახალციხის კლინიკა იმედში“ ეპიდემიოლოგის პოზიციას იკავებს, კორონავირუსის დროს კი, სამცხე-ჯავახეთში შექმნილ ცხელების ორივე ცენტრში ეპიდემიოლოგად ერთდროულად მუშაობდა, რასაც კანონი კრძალავდა – დაავადებათა კონტროლის ეროვნული ცენტრის დირექტორი ამბობს, რომ ხაბულიანს უკვე დიდი ხანია იცნობს და მისი რამდენიმე სამსახურში ერთდროულად მუშაობა რეგიონში კვალიფიციური სპეციალისტების ნაკლებობით არის გამოწვეული:

„ფატი ხაბულიანი, რომელსაც მე ძალიან კარგად ვიცნობ, მას შემდეგ მუშობს ამ სამსახურში, რაც 1995–1996 წლებში საზოგადოებრივი ჯანდაცვის სამსახური შეიქმნა. სამცხე-ჯავახეთში ჩვენ გვაქვს სამწუხაროდ სერიოზული დეფიციტი კვალიფიციური ადამიანებისა ამ კუთხით. ამიტომ სულ არ მიკვირს, რომ ეს თავდადებული ქალბატონი შეიძლება რამდენიმე სამსახურშია. მან იცის ყველა კუთხე-კუნჭული სამცხე-ჯავახეთისა, იცნობს მოსახლეობას ძალიან კარგად“, – განმარტავს გამყრელიძე.

რაც შეეხება ინტერესთა კონფლიქტს, ხაბულიანისა და მისი შვილის საქმიანობასთან დაკავშირებით, გამყრელიძე მიიჩნევს, რომ არც ის არის გასაკვირი, თუ ხაბულიანის შვილი, ნინო ზედგინიძე, რეგიონში ამავე მიმართულებით მუშაობს და დაავადებათა კონტროლის ეროვნული ცენტრის რეგიონული განყოფილების უფროსია, რადგან შვილიც, ისევე როგორც დედა, თავის საქმეს კარგად ასრულებს:

„მიუხედავად იმისა, რომ სამედიცინო განათლება არ აქვს [ნინო ზედგინიძეს], საზოგადოებრივი ჯანდაცვა ისწავლა ძალიან კარგად და მართავს რეგიონში ამ პროცესებს. მესმის, რომ არის გარკვეულწილად უხერხულობა, როდესაც დედა და შვილი ერთი და იმავე მიმართულებით მუშაობს მაგრამ ეს არ არის ურთიერთდაქვემდებარება. ფატი ადგილობრივი ხელისუფლების დაქვემდებარებაშია, ხოლო ნინო არის დაავადებათა კონტროლის ეროვნული ცენტრის წარმომადგენილი ანუ ცენტრალური ხელისუფლების დაქვემდებარებაში. ამიტომ ეს არ არის ინტერესთა კონფლიქტი, მაგრამ უხერხულობის ელემენტი ახლავს“.

ფატი ხაბულიანისა და მისი შვილის, ნინო ზედგინიძის მუშაობაში შესაძლო ნეპოტიზმი ნიშნების არსებობაზე კვლევა „საერთაშორისო გამჭვირვალობა–საქართველომ“ გამოაქვეყნა.

ორგანიზაციამ მოუწოდა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს შიდა აუდიტსა და ახალციხის მუნიციპალიტეტის მერიის შესაბამის სამსახურს, დაინტერესდნენ ნაირა ხაბულიანისა და მისი შვილის, ნინო ზედგინიძის ინტერესთა კონფლიქტის საკითხით და მოახდინონ შესაბამისი რეაგირება.

„სამხრეთის კარიბჭეს“ კითხვაზე, მოახდინა თუ არა სამინისტრომ ან დაავადებათა კონტროლის ეროვნულმა ცენტრმა რაიმე სახის რეგირება ან შესწავლა კვლევაში მოყვანილი საკითხებისა, გამყრელიძემ ასე უპასუხა: „რისი შესწავლა უნდა დავიწყოთ?! გეუბნებით მე ჩემს მოსაზრებას, ამას თუ იურიდიული კუთხით მივუდგებით, რეგიონი დარჩება საზოგადოებრივი ჯანდაცვის ცენტრის კვალიფიციური სპეციალისტის გარეშე. გაათავისუფლეთ მაშინ ხაბულიანი და ნახავთ...“.






ახალციხეში ეპიდემიოლოგიური ზედამხედველობის ყველა რგოლს ერთი ოჯახის წევრები აკონტროლებენ

ფატი ხაბულიანი სამცხე-ჯავახეთის გუბერნატორმა დაიბარა

ახალციხის მერიის აუდიტმა ფატი ხაბულიანის საქმიანობის შესწავლა დაიწყო


[თაკო ფეიქრიშვილი, თიკო ზაზაძე]