ახალციხის მერიის აუდიტმა ფატი ხაბულიანის საქმიანობის შესწავლა დაიწყო

„შიდა აუდიტის და ინსპექტირების სამსახურის მიერ, მიმდინარეობს ააიპ “საზოგადოებრივი ჯანდაცვის ცენტრის” დირექტორის საქმიანობასთან დაკავშირებული გარემოებების შესწავლა/გამოკვლევა, რომელიც დასრულებული არ არის. შესაბამისად დღეის მდგომარეობით, ადმინისტრაციული ორგანოსათვის უცნობია, იკვეთება თუ არა ინტერესთა კონფლიქტის ნიშნები “საზოგადოებრივი ჯანდაცვის ცენტრის” დირექტორის საქმიანობაში“, – წერია ახალციხის მუნიციპალიტეტის მერიის მიერ გამოგზავნილ წერილში.

„საერთაშორისო გამჭვირვალობა–საქართველომ“ ახალციხის “საზოგადოებრივი ჯანდაცვის ცენტრის” დირექტორის ნაირა იგივე ფატი ხაბულიანის შესახებ კვლევა 12 აგვისტოს გამოაქვეყნა. დოკუმენტში ნათქვამია, რომ ხაბულიანთან მიმართებით იკვეთება ნეპოტიზმის ნიშნები, რადგან მისი ოჯახის წევრები ახალციხის მუნიციპალიტეტში ეპიდემიოლოგიური ზედამხედველობის ყველა რგოლს აკონტროლებენ. კერძოდ:

“ნაირა ხაბულიანი ააიპ ახალციხის მუნიციპალიტეტის საზოგადოებრივი ჯანდაცვის ცენტრს 13 წელია ხელმძღვანელობს. ბოლო სამი წლის განმავლობაში კი პარალელურად შპს „ახალციხის კლინიკა იმედში“ და შპს „აბასთუმნის ფილტვის ცენტრში“ ეპიდემიოლოგია. ასევე, ბოლო ქონებრივი დეკლარაციის თანახმად, ნაირა ხაბულიანი ანაზღაურებად სამუშაოებს ასრულებს ჯანმრთელობის კვლევის კავშირისა და თამბაქოს კავშირის პროექტებში. სამი წელია მისი შვილი ნინო ზედგინიძე ჯანდაცვის სამინისტროს სსიპ ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის სამცხე-ჯავახეთის რეგიონული განყოფილების უფროსია. ჯანდაცვის სამინისტრო რეგიონში არსებულ ეპიდემიოლოგიურ ვითარებაზე ზედამხედველობას სწორედ მისი საშუალებით ახორციელებს. ეს რეგიონული განყოფილება კი მუნიციპალიტეტებში ააიპ საზოგადოებრივი ჯანდაცვის ცენტრებთან ურთიერთობას ხელშეკრულებით არეგულირებს”, - ნათქვამია კვლევაში.

„სამხრეთის კარიბჭეს“ ინფორმაციით, აღნიშნულ საკითხთან დაკავშირებით, ფატი ხაბულიანი და მისი შვილი ნინო ზედგინიძე სამცხე–ჯავახეთის სამხარეო ადმინისტრაციაში დაიბარეს.

[sknews.ge]