ინფექციური საავადმყოფოს ოთხი ახალი პაციენტიდან ერთის წყარო ჯერ უცნობია

„ერთი სომხეთიდან არის შემოსული, ხოლო ორი არის საფრანგეთიდან, როგორც ჩემთვის ცნობილია. მეოთხეს წყარო ჯერჯერობით ბოლომდე არ არის მოძიებული, მაგრამ მაინც იკვეთება, რომ შემოტანილი შემთხვევაა“, – ამბობს მარინა ეზუგბაია.

მისივე თქმით, ახალი პაციენტების ზოგადი მდგომარეობა მძიმე არ არის და მათ დამატებითი კვლევები უტარდებათ.

„ჩვენთან შემოვიდა ოთხი ახალი შემთხვევა ერთ-ერთი ბავშვი ბათუმიდან, მშობელთან ერთად. მშობელს ჯერ დადასტურებული არ აქვს, მაგრამ ალბათ მასაც დაუდასტურდება. ჯერჯერობით შემოსული ახალი პაციენტის მდგომარეობა არ არის მძიმე. დღეს ჩატარდება გაფართოვებული კვლევებით და პაციენტის მდგომარეობის შეჯერებით შეფასდება სიტუაცია“, – განუცხადა ჟურნალისტებს ეზუგბაიამ.

თბილისის ინფექციურ საავადმყოფოში ამ დროისთვის 36 დადასტურებული შემთხვევაა, ხოლო 22 პაციენტი გამოჯანმრთელებულია.

საქართველოში, 2 აპრილის 11:30 საათის მონაცემებით, კორონავირუსის 130 შემთხვევაა დადასტურებული, 26 პაციენტი უკვე გამოჯანმრთელებულად მიიჩნევა. კარანტინის რეჟიმში 5 550 პაციენტი იმყოფება, ხოლო სტაციონალური მეთვალყურეობის ქვეშ 281.

ცნობისთვის საქართველოში კორონავირუსის შემთხვევა პირველად 26 თებერვალს დაფიქსირდა. ვირუსის დაფიქსირებიდან ერთი თვეზე მეტი გავიდა, ამ დროის განმავლობაში ქვეყანაში გარდაცალების ფაქტი არ ფიქსირდება.

[ნუკა სტეფნაძე, ახალციხე]