ხიზაბავრაში კაცის ცემისა და საფლავის გათხრის იძულებისთვის დაკავებულები პატიმრობაში დატოვეს

სასამართლო პორცესი ახალციხეში დღეს, 27 აგვისტოს გაიმართა. მოსამართლემ ლუიზა თოდუამ დაცვის მხარის მოთხოვნა, რომ დაკავებულები გირაოს გადახდის, 10 000 ლარის სანაცვლოდ გაეთავისუფლებინა, არ დააკმაყოფილა.

დაკავებულები ბრალს ნაწილობრივ აღიარებენ და ამბობენ, რომ მომხდარი წინასწარ არ დაუგეგმავთ. მათ ინტერესებს პროცესზე ადვოკატი ნინო დემეტრაძე იცავდა.

ნინო დემეტრაძის განცხადებით, ი.გ–მ მანუჩარ მურადაშვილს მხოლოდ სიტყვიერი შეურაცხყოფა მიაყენა: "მან არ იცოდა რა საქმე ჰქონდა კ.პ–ს მურადაშვილთან, ეს მხოლოდ მანქანაში გაიგო. მას არ დაურტყამს, იგი აშველებდა".

რაც შეეხება კ.პ–ს, საფლავის გათხრა მანუჩარ მურადაშვილის შეშინების მიზნით, თვითონ დაიწყო.

ასპინძაში, სოფელ ხიზაბავრაში მცხოვრები მანუჩარ მურადაშვილის განცხადებით, 22 აგვისტოს გამგებლის ყოფილმა წარმომადგენელმა კ.პ–მ და მისმა მეგობარმა ი.გ–მ გაიტაცეს, სცემეს და საკუთარი ხელით საფლავის გათხრა აიძულეს. მისი თქმით, თანასოფლელები იმ თანხის დაბრუნებას სთხოვდნენ, რომელიც არ მოუპარავს.

სამართალდამცველებმა კ.პ და ი.გ 25 აგვისტოს დააკავეს.

კ.პ.-ს და ი.გ.-ს ბრალდება საქართველოს სისხლის სამართლის კოდექსის 143-ე მუხლის მესამე ნაწილის „ა“ ქვეპუნქტით, (თავისუფლების უკანონო აღკვეთა, ჩადენილი წინასწარი შეთანხმებით ჯგუფის მიერ), 126-ე მუხლის პირველი პრიმა ნაწილის „ბ“ ქვეპუნქტით (ცემა ან სხვაგვარი ძალადობა, რამაც დაზარალებულის ფიზიკური ტკივილი გამოიწვია) და 150-ე მუხლის მეორე ნაწილის „ა“ ქვეპუნქტით (იძულება ჯგუფურად) წარედგინათ, რაც სასჯელის სახედ და ზომად 7-დან 10 წლამდე პატიმრობას ითვალისწინებს.



[sknews.ge]