‘ვუერთდები ვაჟა ჩიტაშვილის შტაბს’ – გელა დემეტრაძე [ვიდეო]

„მივიღეთ გადაწყვეტილება, ის რაც უკვე მოსალოდნელი იყო ბოლო დროს განვითარებული მოვლენების გამო, მე შევუერთდები ვაჟა ჩიტაშვილის შტაბს, თუნდაც რიგით წევრად. ყველა ადამიანი, რომელ გუნდშიც აქამდე მოვიაზრებოდი, ინდივიდუალურად მიიღებს გადაწყვეტილებას. მე ვფიქრობ, რომ უმეტესობა დარჩება იმ გუნდის ერთგული, რომელ გუნდშიც მე ვიყავი და სადაც მე გავაგრძელებ მოღვაწეობას. უმეტესობა უჭერს მხარს ვაჟა ჩიტაშვილის კანდიდტურას და მისი გამარჯვებისთვის ვიბრძოლებთ“, – განაცხადა გელა დემეტრაძემ.

მისი თქმით, „ევროპულ საქართველოს“ ახალციხეში 300–მდე მხარდამჭერი ჰყავს, იგი დარწმუნებულია, რომ ყველა მათგანი „ევროპელების“ რიგებს დატოვებს: „უმეტესობა მიიღებს მსგავს გადაწყვეტილებას, ამ დღეებში არ მქონია აღნიშნულ საკითხზე საუბარი, მაგრამ ვიცნობ ყველას, ვიცი მათ აზრი და ხასიათი, უმეტესობა მიიღებს მსგავს გადაწყვეტილებას, დარწმუნებული ვარ ამ არჩევნებში ოპოზიცია დადებს სერიოზულ შედეგს“.

კითხვას, რომ არ წასულიყო ვაჟა ჩიტაშვილი „ნაციონალურ მოძრაობაში“ დატოვებდა თუ არა „ევროპულ საქართველოს“, გელა დემეტრაძემ ასე უპასუხა: „დღეს თანხვედრაში არ არის ჩვენი ინტერესები, რაც ჩვენს გუნდს ჰქონდა და რაც პარტიის ცენტრალურ ოფისს აქვს“.

ვინ ჩაანაცვლებს გელა დემეტრაძეს ამ ეტაპზე უცნობია, „ევროპული საქართველოს“ პოლიტსაბჭოს წევრი, ზურა ჩილინგარაშვილი განმარტავს, რომ აგვისტოს ბოლოს უკვე შერჩეული ეყოლებათ, როგორც შტაბის ხელმძღვანელი, ასევე ახალციხე–ადიგენი–ბორჯომი–ასპინძის საარჩევნო ოლქში მაჟორიტარი დეპუტატობის კანდიდატი.

„10–15–მა ადამიანმა დატოვა ორგანიზაცია, დანარჩენები როგორც იყვნენ ალბათ რჩებიან, მათ ჯერ პრეტენზია არ გამოუთქვამთ. ძალიან კონსტრუქციული საუბარი იყო, ვისაც სურდა, რომ დაეჭირა მხარი „ნაციონალური მოძრაობის“ კანდიდატისთვის, ყველამ დატოვა პარტია, თავმჯდომარემ პირველ რიგში“, – ამბობს ზურა ჩილინგარაშვილი.

მისი თქმით, ახალციხეში მათ პარტიას ახალი ოფისი ექნება, რადგან „ახლანდელი ოფისის მეპატრონე დაუკავშირდა და შენობის დაცლა მოსთხოვა“.



[sknews.ge]