„ევროპული საქართველოს“ წევრების, ზურა ჩილინგარაშვილის და ლევან თარხნიშვილის შეხვედრა ახალციხის რაიონული ორგანიზაციის წარმომადგენლებთან 14:00 საათისთვის იგეგმება.
ჩილინგარაშვილის განცხადებით, დღეს გაირკვევა ვინ დატოვებს „ევროპულ საქართველოს“.
„გადაწვეტილებას ჩვენ არ მივიღებთ, გადაწყვეტილებას მიიღებენ თვითონ პარტიის წევრები, ვისაც სურვილი აქვს დარჩება, მაგრამ დარჩება ეს იმას არ ნიშნავს, რომ ჩემთან პარტიაში იქნებიან და „ნაციონალური მორაობის“ კანდიდატს დაუჭერენ მხარს, ასეთი ხალხი ავტომატურად თავს დააყენებს პარტიის მიღმა. მაგათ წასვლას აღარ დაველოდებით და ჩვენ თვითონ გავრიცხავთ. ვისაც აქვს რაიმე პრეტენზია მოვუსმენთ, მაგრამ პარტიას არ დავაშლევინებთ არავის. ჩვენ ვართ ძალიან ძლიერად წარმოდგენილი სხვა პარტიებთან შედარებით სამცხე–ჯავახეთში და ამ რეგიონში „ევროპული საქართველოს“ წევრები არ აპირებენ სხვა რომელიმე პარტიის კანდიდატის მხარდაჭერას, ჩვენ გვეყოლება ჩვენი კანდიდატი“, – განაცხადა ზურა ჩილინგარაშვილმა „სამხრეთის კარიბჭესთან“.
მისი თქმით, რაიონული ორგანიზაციის თავმჯდომარესთან, გელა დემეტრაძესთან საუბრის შემდეგ გახდება ცნობილი მოუწევთ თუ არა ახალი თავმჯდომარის მოძებნა.
„ჯერ არ გვიფიქრია რაიონული ორგანიზაციის თავმჯდომარის დანიშვნაზე, რადგან ტელევიზორით ვერ დაველაპარაკებოდით საკუთარი პარტიის წარმომადგენელს, გვინდა რომ პირადად შევხვდეთ და კიდევ ერთხელ გავესაუბროთ. უბრალოდ დადგეს და აგვიხსნას, რას ნიშნავს, იყო ერთი პარტიის ლიდერი და მხარს უჭერდე მეორე პარტიის კანდიდატს“, – ამბობს ჩილინგარაშვილი.
"ევროპული საქართველოს" კურატორის სამცხე–ჯავახეთში, ზურა ჩილინგარაშვილის განმარტებით, გელა დემეტრაძემ „ნაციონალური მოძრაობის“ კანდიდატის მხარდაჭერა პარტიასთან შეთანხმების გარეშე გადაწყვიტა, რაც მათთვის მიუღებელია.
„ჩვენს პარტიაში შეთანხმება იყო ასეთი, რომ თუ ვანო მერაბიშვილი „ნაციონალური მოძრაობდან“ იყრიდა კენჭს „სამცხეში“, ჩვენ აღნიშნულ ოლქში კანდიდატს აღარ დავაყენებდით. მაგრამ მერაბიშვილმა უარი განაცხადა საკუთარი კანდიდატურის დაყენებაზე, ჩვენ ყველანაირი ვალდებულება რაც გვქონდა მის მიმართ, მოგვეხსნა, იმიტომ რომ ჩემთვის ოპოზიციური პარტია ეს იქნება „ნაციონალური მოძრაობა“ თუ „ლელო“, ყველა პოლიტიკური მოწინააღმდეგეები არაიან. აქამდე იმიტომ არ მოხდა „ევროპული საქართველოს“ მიერ სამცხე–ჯავახეთში კანდიდატის წარდგენა, რომ ჩვენ ველოდებოდით ვანო მერაბიშვილის გადაწყვეტილებას“, – განმარტავს ჩილინგარაშვილი.
ჩილიგნარაშვილის თქმით, მათგან განსხვავებით, გელა დემეტრაძემ გადაწყვეტილება, რომ ჩიტაშვილისთვის დაეჭირა მხარი, არა პოლიტიკური შეხედულებების, არამედ ნაცნობობის და მეგობრობის გამო მიიღო.
„იმის მტიკიცება, რომ დაიწყო, რა გავაკეთე ისეთი, მე ვაჟას ვერ ვუღალატებო, ეს არის ძალიან ცუდი, როდესაც ძველი ნაცნობის და ნათესაობის, მეგობრობის გამო ხდება მხარდაჭერა, ეს არის ცუდი. ჩვენთან ეს პარტიაში არ არის მიღებული, ამიტომ გელას გზა ხსნილი აქვს, უნდა იმუშაოს ვაჟა ჩიტაშვილისთვის? ამისთვის ჩვენი პარტიის რიგებიც და თანამდებობაც უნდა დატოვოს. არ ვიცი იქნებ გუშინდელი ღამის შემდეგ გაანალიზა და მიხვდა რომ შეცდომა დაუშვა, იტყვის ამას რომ მე შემაცდინეს ან შეცდომა დავუშვი, მაშინ არაფერი უდგას წინ რომ დარჩეს, მაგრამ თუ არა, მაშინ დემეტრაძე პარტიასაც დატოვებს და თანამდებობასაც“.
კითხვაზე, თუ გელა დემეტრაძემ ჩიტაშვილთან დაკავშირებით გადაწყვეტილება ძველი ნაცონობობის გამო მიიღო, იგივე ხომ არ მოხდა მათი მხრიდან ვანო მერაბიშვილთან დაკავშირებით, ზურა ჩილინგარაშვილი გვპასუხობს: „ვანო მერაბიშვილი ერთადერთი ოპოზიციური კანდიდატია, რომელიც შვიდი წელი უკანონოდ იყო პოლიტპატიმარი, ამიტომ მას უნდა მისცე შანსი. ვანო მერაბიშვილის კანდიდატია ჩიტაშვილი, აქედან გამომდინარე, ჩვენ რომ მეგობრული შეხედულებებით ვაპირებდეთ გადაწყვეტილების მიღებას, მაშინ მასაც დავუჭერდით მხარს“.
ცნობისთვის „ევროპული საქართველოს“ ახალციხის რაიონული ორგანიზაციის ხელმძღვანელმა გელა დემეტრაძემ განაცხადა, რომ ის 2020 წლის ოქტომბრის არჩევნებში მხარს „ნაციონალური მოძრაობის“ კანდიდატს ვაჟა ჩიტაშვილს უჭერს, აღნიშნული გადაწყვეტილება მიუღებელი აღმოჩნდა „ევროპული საქართველოს“ სათაო ოფისისთვის. ამის გამო, გუშინ პარტიის ერთ–ერთმა ლიდერმა, სერგი კაპანაძემ განაცხადა, რომ გელა დემეტრაძე პარტიიდან გარიცხეს და თავმჯდომარის თანამდებობაც დაატოვებინეს.
„ევროპულ საქართველოში“ ვითარება ვანო მერაბიშვილის ახალციხეში ვიზიტის შემდეგ დაიძაბა, მერაბიშვილმა 16 აგვისტოს „ევროპული საქართველოს“ ადგილობრივ წარმომადგენლებს მოუწოდა, რომ მხარი მათი კანდიდატისთვის, ვაჟა ჩიტაშვილისთვის დაეჭირათ.
[sknews.ge]