‘თავისუფლება-ზვიად გამსახურდიას გზამ’ სამცხეში მაჟორიტარი დეპუტატობის კანდიდატი დაასახელა

კანდიდატი ახალციხის ცენტრალურ პარკში, 14:00 საათზე პარტიის თავმჯდომარემ, მალხაზ გორგასლიძემ დაასახელა. ღონისძიებას პარტიის მხარდამჭერები ესწრებოდნენ.

„ჩვენ, როცა ერთხელ ვიყავით ხელისუფლებაში მივაღწიეთ დამოუკიდებლობას, ჩვენ არ დაგვცალდა მეორე ეტაპი საქართველოს აღორძინების იმიტომ, რომ მტერი შემოგვესია. რუსეთმა დაიპყრო საქართველო და დღემდე დაპყრობილია. ჩვენი მთავარი მიზანია, საქართველოში ყველა ადამიანის უფლება დავიცვათ, მე პენსიას მოვუმატებ და ვერც ხელფასს მოვუმატებ რატომ მოვატყუო?! ყველა ადამიანის პრობლემას მივიტანთ პარლანეტში“, - ამბობს ხუციშვილი.

პარტიის თავმჯდომარემ აღნიშნა, რომ წინასაარჩევნო კამპანია მათ მესხეთიდან დაიწყეს.

„დღეს საქართველოს ეროვნულ განმათავისუფლებელმა მოძრაობამ და მისმა ფლაგმანმა პოლიტიკურმა მოძრაობამ "თავისუფლება–ზვიად გამსახურდიას გზამ გადაწყვიტა", რომ თავისი წინასაარჩევნო კამპანია დაეწყო ქალაქ ახალციხიდან და აქ წარადგინა ეროვნული მოძრაობის ვეტერანი, ზურაბ ხუციშვილი. ჩვენ მოვიპოვეთ სახელმწიფოებრიობა, მაგრამ გვაქვს უამრავი პრობლემა, რომელიც უკავშირდება პოლიტიკას. ჩვენ გვჭირდება ადამიანები, რომელებიც მოდიან ეროვნული მოძრაობიდან“, - ამბობს გორგასლიძე.

ხუციშვილმა აღნიშნა, რომ მათ წინასაარჩევნოდ მოსახლეობასთან შეხვედრები უკვე დაიწყეს და რეგიონის რამდენიმე მუნიციპალიტეტის სოფლებში ამომრჩევლებს შეხვდნენ.



[მარიამ ბარძიმაძე]