ლეიბორისტულმა პარტიამ სამცხეში მაჟორიტარობის კანდიდატი დაასახელა

პრემიერ-მინისტრობის, მაჟორიტარობისა და მერობის კანდიდატები ლეიბორისტულმა პარტიამ 26 სექტემბერს ოფიციალურად დაასახელა. პარტიის ლიდერის შალვა ნათელაშვილის თქმით, სამცხეში საპარლამენტო არჩევნებზე მათი კანდიდატი გიორგი ჩიტაური იქნება, რომელსაც მოსახლეობა იცნობს, როგორც ფოლკლორული სიმღერების შემსრულებელს.

„მესხეთი ჩვენი სიამაყე, ქართული პოლიტიკის სამშობლოა. ჩვენო მესხებო, მინდა მოგიწოდოთ, არ გაყვეთ სამარცხვინო კანდიდატებს, სამარცხვინო მესხებს. აგერ, კანდიდატად ვაგზავნით ჭეშმარიტ, მაგარ ქართველს, გიორგი ჩიტაურს, რომელსაც იცნობს ჩვენი საზოგადოება, როგორც მთის ფოლკლორის საუკეთესო შემსრულებელს. ძალიან მაგარ ახალგაზრდას და ნიჭიერს. მიხედეთ და გააკეთეთ ყველაფერი იმისათვის, რომ მესხეთმა დაიბრუნოს ქართულ პოლიტიკაში წამყვანი პოზიციები, როგორც მას ყოველთვის ეკავა“, - განაცხადა წარდგენისას შალვა ნათელაშვილმა.

თავად გიორგი ჩიტაური ამბობს, რომ უკვე 12 წელია ლეიბორისტული პარტიის წევრია, მაჟორიტარობა კი იმიტომ გადაწყვიტა, რომ მოსახლეობას დაეხმაროს:

„ეს ყველაფერი გადამაწყვეტინა იმ გარემოებამ, რომ უამრავი წერილი შემოდიოდა, ადამიანები ითხოვდნენ დახმარებას და ვფქირობ, ყველაზე საუკეთესო იყო, კენჭი მეყარა სამცხე-ჯავახეთში. იმისათვის, რომ ადამიანებს დავეხმაროთ იმ უკიდურესი გაჭირვების დაძლევაში, რა მდგომარეობაშიც ამ ხელისუფლების ქმედებამ მიიყვანა. ჩემი ამ გადაწყვეტილების უმთავრესი მიზეზი იყო ის, რომ ადამიანებს დღეს ძალიან უჭირთ და ვფიქრობ, რომ მექნება საშუალება, რომ ამ ადამიანებს გვერდში დავუდგე და ერთხელ და სამუდამოდ ამ ქვეყანაში დაიძლიოს სიღარიბის, სიდუხჭირის პრობლემა“, - განაცხადა ჩიტაურმა.

29 წლის გიორგი ჩიტაური სამცხეში, ახალციხე-ადიგენი-ასპინძა-ბორჯომის ოლქში მეშვიდე მაჟორიტარობის კანდიდატია. ამ დრომდე დასახელებული არიან:

N2 "ბაქრაძე, უგულავა, ბოკერია - ევროპული საქართველო - მოძრაობა თავისუფლებისთვის" - ზურაბ ჩილინგარაშვილი
N5 „ერთიანი ნაციონალური მოძრაობა - გაერთიანებული ოპოზიცია „ძალა ერთობაშია“ - ვაჟა ჩიტაშვილი
N10 „შალვა ნათელაშვილი-საქართველოს ლეიბორისტული პარტია“ - გიორგი ჩიტაური
N21 „თავისუფალი საქართველო (კახა კუკავა, გიორგი წულაია)“ - გოდერძი კუბლაშვილი
N29 დავით ჭიჭინაძე - ტრიბუნა - გელა კვარაცხელია
N31 თავისუფლება-ზვიად გამსახურდიას გზა - ზურაბ ხუციშვილი
N41 ქართული ოცნება - დემოკრატიული საქართველო - ანტონ ობოლაშვილი

[თაკო ფეიქრიშვილი]