'ევროპული საქართველოს' დეპუტატობის კანდიდატმა წინასაარჩევნო კამპანია დაიწყო

ჩილინგარაშვილი დერცელში ადგილობრივებს შეხვდა, სადაც მოსახლეობის პრობლემები მოისმინა და მათ პარტიის გეგმა გააცნო, მმართველობის სისტემის შეცვლასთან დაკავშირებით.

„ავუხსენი, რომ 30 წლის განმავლობაში ერთ წრეზე ტრიალი ხალხს მობეზრდა, იმიტომ რომ ერთპიროვნული მმართველობა საქართველოსთვის დამღუპველია და „ევროპული საქართველო“ სთავზობს კოალიციურ მთავრობას. ეს ნიშნავს, რომ ყველა წევრზე განაწილდება პასუხისმგებლობა. ზვიად გამსახურდია წავიდა, ჩვენ რა შუაში ვართ, ზვიადია დამნაშავეო. შევარდნაძის პერიოდში, შევარდნაძეა დამნაშავეო. მიშას პერიოდში - მიშააო. ბიძინას პერიოდში, ბიძინაა დამნაშავე და ის ხალხი, რომელიც პოლიტიკოსობენ და პოლიტიკოსობა უნდათ, მხრებს იჩეჩავდნენ. არადა, სინამდვილეში მათი მოყვანილი იყო ერთიც და მეორეც“, - ამბობს ჩილინგარაშვილი.

მისივე თქმით, სოფელში 70-მდე ადგილობრივს შეხვდა, რომლებმაც მთავარი პრობლემებზე - მიწის დაკანონებისა და ტყით სარგებლობის საკითხებზე ისაუბრეს.

„დერცელში აქვთ მიწის დაკანონებისა და ტყის პრობლემა. ევროპულ საქართველოს მაგაზეც აქვს პროექტი მომზადებული. სახელმწიფოს ყველა კუთვნილი მიწა უნდა გადაეცეს მოსახლეობას, იგივე ტყეებიც. ისინი უკეთესად მიხედავენ ვიდრე მეტენდერეები“.

კანდიდატის თქმით, ყოველდღიური შეხვედრები დაგეგმილი არ აქვს.

„მექნება კარდაკარის პრინციპით შეხვედრები, ყველა სოფელში, სადაც მოვასწრებ. ყველა მოსახლესთან მე წერილი მექნება გამზადებული მესიჯბოქსი, წერილი „ევროპული საქართველოსგან“, სადაც გამარჯვების შემთხვევაში ვალდებულებას ვიღებ და პირველი ასი, მეორე ასი დღის განმავლობაში ყველაფერი იქნება გაწერილი, თუ რა უნდა გაკეთდეს“,- ამბობს ჩილინგარიშვილი.

ბოლო მონაცემებით, სამცხის ოლქში მაჟორიტარობის კანდიდატი ექვსმა პარტიამ დაასახელა: "ევროპული საქართველოდან" ზურა ჩილინგარაშვილი იქნება, "ქართული ოცნებიდან" – ანტონ ობოლაშვილი იბრძოლებს, ვაჟა ჩიტაშვილი – "ნაციონალური მოძრაობიდან", "თავისუფლება ზვიად გამსახურდიას გზას" ზურა ხუციშვილი წარმოადგენს, ხოლო "თავისუფალი საქართველო" – გოდერძი კუბლაშვილის წარდგენას გეგმავს. პარტია დავით ჭიჭინაძე ტრიბუნას კანდიდატი კი, გელა კვარაცხელია იქნება.

საპარლამენტო არჩევნები საქართველოში 2020 წლის ოქტომბერში, ისტორიაში პირველად, 120/30 სისტემით ჩატარდება.

[მარიამ ბარძიმაძე]