სამცხე-ჯავახეთის უნივერსიტეტი პროფესიულ პროგრამებზე მიღებას აცხადებს

პროფესიული პროგრამების შესახებ დღეს, 3 აგვისტოს სამცხე-ჯავახეთის სახელმწიფო უნივერსიტეტის რექტორმა, მაკა ბერიძემ ვიდეო ჩართვაში ისაუბრა. მისი თქმით, სამი ახალი პროფესიული პროგრამა, რომლებმაც ავტორიზაცია გაიარეს, სწავლის შესაძლებლობას აძლევს, როგორც აბიტურიენტებს, ისე არასრული საშუალო განათლების მქონე (ცხრა კლასი) პირებს.

“საექთნო განათლება ახალი სტანდარტის, ახალი ჩარჩო-დოკუმენტის საფუძველზე შემუშავებული პროგრამაა. იგი გრძელდება სამი წლის განმავლობაში და ასევე მეხუთე საფეხურის პროგრამაა, რაც ნიშნავს იმას, რომ აძლევს მეხუთე საფეხურის, უმაღლესი კვალიფიკაციის დამადასტურებელ დიპლომს“- განმარტა ვიდეო ჩართვაში რექტორმაა.
მისივე თქმით, პროგრამის პრაქტიკულ კომპონენტებსა და კლინიკურ მოდულებს ახალციხის „ევექსის“ საავადმყოფო და „სიცოცხლის ხე“ განახორციელებენ.

რაც შეეხება საბაჟო საქმის პროფესიულ პროგრამას, ის ახალქალაქში , სამცხე-ჯავახეთის სახელმწიფო უნივერსიტეტის მესამე კორპუსში განხორციელდება. აღნიშნული პროგრამა წელიწად-ნახევრის განმავლობაში გაგრძელდება და სტუდენტებს საშუალება ექნებათ, სწავლის პერიოდში საერთო საცხოვრებლით ისარგებლონ.

კომპიუტერული ქსელისა და სისტემების საგანმანათლებლო პროგრამა ინტეგრირებული მოდულების მეშვეობით წარიმართება და 3 წლიანია. ეს მოდული გულისხმობს იმას, რომ ამ პროგრამაზე მოხვედრა შეეძლებათ არასრული საშუალო განათლების (9 კლასი) მქონე აპლიკანტებს, რომლებიც შესაბამის გამოცდას ჩააბარებენ. ამასთან ერთად, პროგრამის დამთავრების შემდეგ, სტუდენტი სამცხე-ჯავახეთის სახელმწიფო უნივერსიტეტის მიერ გაცემულ დიპლომს მიიღებს და იგი მე-12 კლასის ატესტატთან იქნება გათანაბრებული.

„ეს არის უნიკალური პროგრამა, რომელიც აძლევს შანსს სწორედ ცხრაკლასდამთავრებულებს, ვისაც არ აქვს სრული, ზოგადი, განათლების დამადასტურებელი დოკუმენტი, ჩააბარონ ერთი გამოცდა“- განმარტავს მაკა ბერიძე.

გარდა ამ სამი პროგრამისა, უნივერსიტეტში უკვე ფუნქციონირებს ბუღალტრული აღრიცხვის საგანმანათლებლო პროგრამა.

პროგრამებზე რეგისტრაცია www.vet.emis.ge-ზე, 10 აგვისტოს ჩათვლით გაგრძელდება. ეთნიკურ უმცირესობებს გამოცდების ჩაბარება მშობლიურ ენაზე შეეძლებათ, თუმცა სწავლება სახელმწიფო ენაზე განხორციელდება.

[sknews.ge]