პროფესიული განათლების მიღების მსურველთა რეგისტრაცია დაიწყო

პროფესიული განათლების მიღების მსურველებს ახალციხეში სწავლა ორ საგანამანათლებლო დაწესებულებაში შეუძლიათ. საზოგადოებრივმა კოლეჯმა "ოპიზარმა" და სამცხე–ჯავახეთის სახელმწიფო უნივერსიტეტმა მიღება სხვადასხვა მიმართულებით გამოაცხადეს.

მსურველებს უნივერსიტეტში სწავლა ორ პროგრამაზე შეუძლიათ:
ტანსაცმლის მხატვრული კონსტრუირება;
ქვისა და სხვა მასალების დეკორატიული დამუშავება.

რაც შეეხება საზოგადოებრივ კოლეჯ "ოპიზარს", აქ 9 პროგრამაზე 161 ადგილია გამოცხადებული.
მცენარეების დამამზადებელი;
ვეტერინარიული მომსახურების სპეციალისტი;
კონდიტერი;
მზარეული;
ბუღალტერი;
ინტერნეტტექნოლოგი (ვებსპეციალისტი);
დაბალი ძაბვის ელექტრიკოსი;
შემდუღებელი;
თმის სტილისტი.

სწავლების ხანგრძლივობა მინიმუმ რვა თვე და მაქსიმუმ წელიწად–ნახევარია.

„23 აპრილს მისაღები გამოცდები გვექნება. ყველა მიმართულებაზე სავალდებულოა ზოგადი უნარების ჩაბარება და ასევე პროფილის მიხედვით, დარგობრივი გამოცდა. გამოცხადებული პროგრამებიდან მხოლოდ ელექტრიკოსისა და თმის სტილისტის მიმართულებაა მოდულური, ამ მიმართულებით სწავლა წელიწად–ნახევრი იქნება“, – განმარტავს საზოგადოებრივ კოლეჯ "ოპიზარის" ხელმძღვანელი ბელა ავალიშვილი.

პროფესიულ პროგრამებზე ასაკი შეზღუდული არ არის. სწავლის მსურველებს შეუძლიათ სახელმწიფოს მიერ დაფუძნებულ საგანმანათლებლო დაწესებულებაში, სრული სახელმწიფო დაფინანსებით, სასურველ პროფესიას დაეუფლონ.

სასურველი პროგრამისა და კოლეჯის/უნივერსიტეტის შერჩევა შესაძლებელია შეფასებისა და გამოცდების ეროვნული ცენტრის ვებ-გვერდზე (www.naec.ge) და პროფესიული განათლების ვებ-პორტალზე (www.vet.ge).

რეგისტრაციის გავლა შესაძლებელია საქართველოს მასშტაბით არსებულ საინფორმაციო ცენტრებში, სამინისტროს საგანმანათლებლო რესურსცენტრებსა და პროფესიული საგანმანათლებლო პროგრამების განმახორციელებელ დაწესებულებებში.

რეგისტრაციის მსურველმა თან უნდა იქონიოს მხოლოდ პირადობის მოწმობა.

განათლების სამინისტროს ინფორმაციით, სპეციალური საგანმანათლებლო საჭიროების მქონე პირები რეგისტრაციას ალტერნატიული პროფესიული ტესტირებით გადიან, რაც პროფესიის მოსინჯვის გზით მათთვის პროფესიის შერჩევას გულისხმობს.

ეთნიკური უმცირესობის წარმომადგენლები ტესტირებას მშობლიურ ენაზე გაივლიან.

[თაკო ფეიქრიშვილი, ახალციხე]