ახალციხეში აზერბაიჯანის მოქალაქეს კუთვნილი მანქანა დაუზიანეს

შემთხვევა 4 აგვისტოს, ღამით დაახლოებით 00:00 საათზე მოხდა. როგორც მანქანის მეპატრონე, აზერბაიჯანის მოქალაქე, რამინ მარდალიევი „სამხრეთის კარიბჭესთან“ ჰყვება, მისი კუთვნილი BMW საცხოვრებელ სახლთან ჰყავდა გაჩერებული: „ღამის თორმეტი საათი იქნებოდა, ყველა ვიწექით სახლში, რამდენიმე კაცი მოვიდა, არ ვიცი ვინ იყვნენ, 2-3 წუთში დააზიანეს მანქანა და ეგრევე გაიქცნენ. ხმაური გავიგე, სანამ ჩავიცვი და გამოვედი უკვე წავიდნენ, ვერავინ ვიცანი. გამოვუძახე პოლიცია“.

მარდალიევი რეპატრირებული მესხების ოჯახიდანაა. იგი წლებია ახალციხეში ცხოვრობს. ამბობს, რომ აქამდე კონფლიქტი არავისთან ჰქონია.

„საერთოდ, პირადად არავისთან კონფლიქტი არ გვქონია. იმ დროს, როცა ეს ამბავი მოხდა, ჩემი მეზობლები იყვნენ ჩვენი სახლის ზემოთ, სვამდნენ, ქეიფობდნენ და მგონია, რომ მათი გაკეთებულია“, - ამბობს დაზარალებული.

მისივე თქმით, ადგილზე პოლიცია იმავე საღამოს გამოიძახა, თუმცა ამ დრომდე ელოდება პასუხს სამართალდამცველებისგან: „არაფერს მეუბნებიან, უყურადღებოდ ვარ, იმიტომ, რომ აზერბაიჯანის მოქლაქე ვარ“.

შსს-ში აცხადებენ, რომ საქმეზე მიმდინარეობს გამოძიება, 187-ე მუხლით, რაც ნივთის დაზიანებას ან განადგურებას გულისხმობს.



[თაკო ფეიქრიშვილი]