ახალციხეში მსუბუქი ავტომანქანა დაიწვა

შემთხვევა, კოსატავას ქუჩაზე, 25 აპრილს გამთენიისას, 03:20 საათზე მოხდა. დაზიანებულია "ნისანის" მარკის ავტომანქანა. შემთხვევის შედეგად არავინ დაშავებულა.

როგორც "სამხრეთის კარიბჭესთან" არამ პოღოსოვის მეუღლე ჰყვება, გამთენიისას ხმაურმა გააღვიძა – "მანქანა იყო მოსული, ფარების სინათლე სახლში შემოდიოდა. მერე ხმა მომესმა, ჩვენი მანქანის "კაპოტს" რაღაცა მაგრად დაარტყეს. არ ვიცი რა გახეთქეს, რომ ცეცხლი ავარდა. ვიდრე ავდექი, მეუღლე გავაღვიძე და გამოვედი, უკვე წასულები იყვნენ", – ამბობს სუსანა აკოფოვა.

მისივე თქმით, შემთხვევის შედეგად, ავტომანქანას წინა ნაწილი, სალონთან ერთად დაიწვა. სახანძრო–სამაშველო ჯგუფს, აკოფოვამ თავად გამოუძახა – "უკანა სალონი და მანქანის უკანა ნაწილი გადარჩა. დანარჩენი დამწვარია, სახანძრომ მოუსწრო და ჩააქრეს".

ვის შეიძლებოდა დაეწვა მანქანა, ამაზე არამ პოღოსოვის მეუღლეს პასუხი არ აქვს – "არავისთან უთანხმოება არ გვქონია, რატომ შეიძლება გაეკეთებინათ, არ ვიცი", – ამბობს სუსანა აკოფოვა.

ამ დროისათვის, ავტომანქანა გადაყვანილია და ექსპერტიზა უტარდება.

მომხდარს შინაგან საქმეთა სამინისტრო 187–ე მუხლით იძიებს, რაც ნივთის დაზიანებას ან განადგურებას გულისხმობს.



[ლუბა გიორგაძე, ახალციხე]