მოქალაქეები ახალციხის ბაზრის წინააღმდეგ – სასამართლომ მხარეებს შეთანხმება შესთავაზა

სასამართლო პროცესი დღეს, 4 აგვისტოს გაიმართა.

მოქალაქეები, ჰაიკ ვაირადიანი და არამაის თუმასიანი ითხოვენ, რომ ისარგებლონ იმ გზის მონაკვეთით, რომელიც მათ საკუთარებაში არსებულ ობიექტებამდე (მანქანების სამრეცხაო და სახლი) მიდის. გზის სადავო მონაკვეთი ახალციხის ბაზრის ადმინისტრაციას ეკუთვნის და მან მარტის თვეში გზა ქვებით ჩაღობა. ამით ფაქტობრივად, ვაირადიანსა და თუმასიანს შენობებამდე მისასვლელი გზა ჩაეკეტათ.

მოსარჩელე მხარის მტკიცებით, ეს მათ ნაკვეთებამდე მისასვლელი ერთადერთი გზაა, ამიტომ ბაზრის ადმინისტრაციას არ აქვს უფლება შეუზღუდოს მოქალაქეებს სარგებლობა.

მოპასუხე მხარის მტკიცებით, ბაზრის ადმინისტრაციამ მოქალაქეებს საკმარისი გზა უკვე დაუთმო, უსასყიდლოდ კი მეტის დათმობას არ აპირებენ . გარდა ამისა, ბაზრის ადმინისტრაცია ეჭვქვეშ აყენებდა ტერიტორიაზე მშენებლობის კანონიერებას, თუმცა ჰაიკ ვაირადიანისა და არამაის თუმასიანის ადვოკატმა, სოსო ხითარიშვილმა აღნიშნული დოკუმენტები სასამართლოს წარუდგინდა.

მოპასუხე მხარის განცხადებით, ვაირადიანისა და თუმასიანს საკამარისი ფართობი აქვთ იმისთვის, რომ ნაკვეთებამდე მისასვლელი გზით ისარგებლონ. შესაბამისად, ბაზრის ადმინისტრაციის ადვოკატმა პროცესზე ამისი ამსახველი ფოტომასალა წარადგინა.

მოსამართლე მარიკა ჩიტაშვილმა მხარეებს შეთანხმება შესთავაზა და სასამართლო სხდომა 19 აგვისტომდე გადაიდო.

[რობი ზარიძე]