‘სამრეცხაოს წინ ლოდები ჩამილაგეს’ – მოქალაქე ახალციხის ბაზრის ადმინიტრაციას სასამართლოში უჩივის

ჰაიკ ვაირადიანს თამარაშვილის ქუჩაზე, ახალციხის ბაზრის მიმდებარედ ავტოსამრეცხაო 2013 წლიდან აქვს. მიმდინარე წლის 11 მარტიდან კი ვეღარ ამუშავებს, რადგან ბაზრის ადმინისტრაციის გადაწყვეტილებით, სამრეცხაოს წინ ლოდები დააწყვეს.

„ბაზრის დირექტორი მოვიდა და მითხრა, რომ ეს მისი ტერიტორიაა და მუშაობის გასაგრძელებლად ყოველთვიურად 300 ლარი უნდა გადამეხადა. სანამ ჩემი სამრეცხაოს წინ გზას და ბაზარს გააკეთებდნენ, ეს ტერიტორია მე მეკუთვნოდა, მაგრამ 2011-12 წლებში როცა ჩემთან მოვიდნენ და მითხრეს სახელმწიფოს გზის გაყვანა უნდოდა დავთანხმდი. როგორ მოხდა რომ შემდეგ ამხელა ტერიტორია ბაზრის საკუთრება აღმოჩნდა? რანაირად? სამართალი სადაა. ახლა ესენი ლუკმას მართმევენ და შემოსავლის გარეშე მტოვებენ“, - ამბობს ვაირადიანი.

ვაირადიანის მსგავსად, პრობლემა აქვს ავტოსამრეცხაოს გვერდზე მცხოვრებ არამაის თუმასიანსაც. ბაზრის ადმინისტრაციის გადაწყვეტილებით ღობე მისი მშენებარე სახლის წინ გააკეთეს.

„ასე გვეუბნებიან უკანა მხრიდან იარეთო, მანდ გორაა, როგორ ვიარო?! მე მაქვს უფლება ჩემს ნაკვეთზე რაც მინდა ის ავაშენო. სახლის წინ ღობე გამივლეს, სამშენებლო მასალებიც კი ვერ შემაქვს“, - ამბობს თუმასიანი.

ვაირადიანიც და თუმასიანიც გზით სარგებლობის უფლებას ითხოვენ. ორივემ სარჩელი სასამართლოში ერთად შეიტანეს. მათი ადვოკატი სოსო ხითარიშვილია.

ხითარიშვილი ამბობს, რომ გზის ის მონაკვეთი, რომლითაც ავტოსამრეცხაო და სახლის მეპატრონე სარგებლობდნენ, მართლაც ბაზრის საკუთრებაა, თუმცა ბაზრის დირექციას არ ჰქონდა უფლება მისი მარწმუნებლებისთვის მუშაობის უფლება შეეზღუდა.

„სავაჭრო ცენტრ ახალციხეს ვედავებით აუცილებელ გზას. ჩაუხერგეს შესასვლელი გზა, ფაქტობრივად ეს ობიექტი გაჩერებულია და ვერ ფუნქციონირებს, ესეც უკანონობაა მათი მხრიდან. ჩვეულებრივ პირობებში მათ უნდა შეეტანათ სარჩელი და ჩვენ პარალელურად მოვითხოვდით აუცილებელ გზას. არ უნდა მომხდარიყო ჩახერგვა და ფუნქციონირების შეწყვეტა. სამრეცხაოს გვერდზე პირს აქვს საცხოვრებელი სახლი, შემოღობეს ტერიტორია, სახლამდე მისასვლელი გზა არაა. იმდაგვარადაა შემოღობილი რომ მანქანის შეყვანაზე საუბარი ზედმეტია’, - ამბობს ხითარიშვილი.

ადვოკატმა, ვაირადიანისა და თუმასიანის საჩივარი ახალციხის რაიონულ სასამართლოში მარტში შეიტანა, თუმცა ჯერჯერობით სასამართლო არ გამართულა.

ავტოსამრეცხაოს მეპატრონე ირწმუნება, რომ ბაზარს თავის დროზე უკანონოდ აქვს აღნიშნული ტერიტორია დარეგისტრირებული. მისი ადვოკატი კი ამბობს, რომ ამ ეტაპზე ისინი მხოლოდ სამრეცხაომდე და მშენებარე სახლამდე მისასვლელი გზის გახსნას ითხოვენ.

„ჩვენ სადავოს არ ვხდით რამდენად კანონიერად დაირეგისტრირეს ტერიტორია. ჩვენ ვითხოვთ გზით სარგებლობის უფლებას, რომ სასამართლომ გამოგვიყოს აუცილებელი გზა“, - ამბობს ხითარიშვილი.

"სავაჭრო ცენტრ ახალციხეს" დირექტორი ვახტანგ ქართველიშვილი გვეუბნება, რომ ის ტერიტორიები, რომლებიც შემოღობეს და ლოდებიც დადეს მათი საკუთრებაა და მომავალში ამ ტერიტორიის კომერციული მიზნებისთვის გამოყენებას გეგმავს.

„აქამდე პატივი ვეცით, ხომ არ შეიძლება ჩემი საკუთრებით წლობით უფასოდ ისარგებლონ?! ვინც მაგ სამრეცხაოს აშენების ნებართვა გასცა, არ იცოდა რომ იქ ჩვენი ტერიტორია იყო?! მე ვეუბნები [ჰაიკ ვაირდანიანს] თუ ეს კომერციული საქმიანობისთვის უნდა გამოიყენო, გადამიხადე თუნდაც ერთი მანქანის ფასი.

მომავალში შეიძლება სამრეცხაო გავაკეთო ან მანქანების სადგომი, იმიტომ რომ საქართველოში, ყველა ბაზარში შესვლა არის ფასიანი . ანალოგიურად მეც მანდ გავაკეთებ მანქანების სადგომს და თუ ვინმე ვერ გადაიხდის ფულს უფასოდ დადგება. აგერ მაქვს ნახაზი, რაც ჩემია ჩემია“,-ამბობს ქართველიშვილი და ამატებს, რომ მანქანით მისასვლელი ჩაკეტა, მაგრამ ობიექტებამდე ფეხით შესასვლელი გზა დატოვა.

ბაზრის დირექტორს აინტერესებს, თუ ვაირადიანს და თუმასიანს ეჭვი ჰქონდათ, რომ ბაზრის მფლობელებმა ტერიტორია უკანონოდ დაისაკუთრეს, აქამდე რატომ არ გააპროტესტეს ეს საკითხი.

„არ ვიცი მე ადრე რა იყო. მაშინ რატო არ იდავეს?! ხმა რატომ არ ამოიღეს. როგორ, შენ ვიღაცამ ტერიტორია წაგართვა და აქამდე ხმას რატომ არ იღებდი?!“, - კითხულობს ბაზრის დირექტორი.

ახალციხის რაიონულმა სასამართლომ სამოქალაქო საჩივარი მიიღო, სარჩელი ასევე ბაზარსაც ჩაბარდა, თუმცა ჯერჯერობით სასამართლოს გამართვის თარიღი არაა ცნობილი.



[მარიამ ბარძიმაძე, ახალციხე]