ახალქალაქის ბაზრის დირექტორი გირაოს სანაცვლოდ გაათავისუფლეს

დღეს, 19 სექტემბერს ახალციხის რაიონულ სასამართლოში ახალქალაქის ბაზრის დირექტორის არარატ საჰარიანისა და ამავე ბაზრის კონტროლიორის მერუჟან ოგანესიანის საქმეზე მორიგი სხდომა გაიმართა.

პროცესზე არარატ საჰარიანის ადვოკატმა დოდო აბრალავამ საქმის აცილება მოითხოვა. ამ მიზეზით, ვიდრე პატიმარს სახაზინო ადვოკატი არ დაენიშნება, მისი საქმის განხილვა გადაიდო.

საჰარიანი 10 000–ლარიანი გირაოთია გათავისუფლებული, მიზეზი კი მისი ჯანმრთელობის მდგომარეობის გაუარესებაა: „15 ოქტომბერს ოპერაცია უნდა გავიკეთო“, – ამბობს იგი.

დღევანდელ სხდომაზე სასამართლომ მხოლოდ მერუჟან ოგანესიანის საქმე განიხილა. იგი მეოთხე თვეა რაც პატიმრობაში იმყოფება.

მიუხედავად იმისა, რომ პროცესზე დაცვის მხარემ ოგანესიანისთვის აღკვეთის ღონისძიების შეცვლაზე იშუამდგომლა და მისი გირაოთი გათავისუფლება ითხოვა, მოსამართლემ იგი მაინც პატიმრობაში დატოვა.

„ოთხი თვეა პატიმრობაში ვარ. ფინანსთა სამინისტროს ჩემი ნებით წამოვყევი არ მივმალულვარ“, – განაცხადა სხდომაზე ოგანესიანმა.
მოსამართლე შალვა მჭედლიშვილმა მომავალი სხდომა 10 ოქტომბერს დანიშნა.

შეგახსენებთ, რომ ფინანსთა სამინისტროს საგამოძიებო სამსახურმა შპს „ახალქალაქის აგრარული ბაზრის“ დირექტორი 21 მაისს დააკავა. საქმის მასალების მიხედვით, საჰარიანი უფროს კონტროლიორთან ერთად მოქმედებდა. პროკურატურის მტკიცებით ბაზრის დირექტორმა მოიჯარე პირს 1000 ლარი გამოართვა, ამავე ბრალდებით ოგანესიანიც დააკავეს. ორივე მათგანს ბრალი სისხლის სამართლის კოდექსის 221–ე მუხლის მეორე ნაწილის ა ქვეპუნქტით ედება, რაც ჯგუფურად კომერციულ მოსყიდვას გულისხმობს.

[მარიამ ბარძიმაძე, ახალციხე]