რა რეკომენდაციები მისცა ახალციხის ბაზრის ადმინისტრაციას მინისტრის მოადგილემ

დღეს, 5 მაისს აგრარული ბაზარი გაიხსნა, მინისტრის მოადგილემ ობიექტი ადგილობრივი თვითმმართველობის წარმომადგენლებთან ერთად დაათვალიერა და იმ რეკომენდაციებზე გაამახვილა ყურადღება, რომელის დაცვაც ბაზრის მუშაობისას აუცილებელია.

„ძალიან მნიშვნელოვანია რომ აქ დაცული უნდა იყოს სოციალური დისტანცია. ერთია რომ აქ ინფრასტრუქტურა უნდა იყოს მოწყობილი და შემიძლია დავადასტურო რომ არის, მაგრამ მეორეა როგორ გაგრძელდება ამ ბაზრის მენეჯმენტი. უნდა დავიცვათ სოციალური დისტანცია, უნდა ჩატარდეს თერმოსკრინინგი და ყველა ის ღონისძიება რომელიც აუცილებელია კორონავირუსის პრევენციისთვის“ – აღნიშნა პავლიაშვილმა.

მისი თქმით ბაზრის ტერიტორიაზე პროდუქცია დახლებზე უნდა იყოს მოთავსებული. რძის პროდუქტების სექციაში მოვაჭრეებს თეთრი ხალათები უნდა ეცვათ, ასევე ყველასთვის სავალდებულოა პირბადის ტარება.

„პროდუქცია არ უნდა იყოს დაბლა, მიწაზე განთავსებული, ყველა უნდა იყოს შესაბამისი სიმაღლის მაგიდებზე განთავსებული. დახლებს შორის უნდა იყოს სივრცე, ადამიანებს შორის დაცული უნდა იყოს დისტანცია, სადაც იყიდება ხორცი, ყველი, უნდა იყოს მოწესრიგებული ხელსაბანი, ტრაპი და უამრავი სხვა რამ, რაც ამას სჭირდება“.

სოლომონ პავლიაშვილმა ადგილობრივი თვითმმართველობის წარმომადგენლებს კიდევ ერთხელ სთხოვა კონტროლი გაუწიონ ბაზრის ტერიტორიაზე ყველა საჭირო რეკომენდაციების დაცვას.

მინისტრის მოადგილე ახალციხის ბაზარში პირველ მაისს იმყოფებოდა, მისი რეკომენდაციების შემდეგ ბეტონის ფილებით შემოიღობა ტერიტორია, დარჩა მხოლოდ ერთი შესასვლელი და გასასვლელი, სადაც მოქალაქეებს თერმოსკრინინგი უტარდებათ. პავლიაშვილმა აღნიშნა, რომ რეკომენდაციების დაუცველობის შემთხვევაში ბაზარი მუშაობას ისევ შეწყვეტს.

ბაზრის ადმინისტრაცია 29 მარტს, ტერიტორიაზე ხალხმრავლობისთვის, 15 000 ლარით დაჯარიმდა. მას შემდეგ დაწესდა შეზღუდვებიც. აქ მხოლოდ რამდენიმე მაღაზია მუშაობდა, დღეიდან კი ობიექტმა მუშაობა სრული დატვირთვით განაახლა.



[რობი ზარიძე, ახალციხე]