სამცხე–ჯავახეთის უნივერსიტეტის რექტორმა აბიტურიენტებს ფეისბუქ ლაივით მიმართა

მაკა ბერიძემ აბიტურიენტებს, ეროვნული გამოცდების წარმატებით დასრულება მიულოცა და სამცხე–ჯავახეთის სახელმწიფო უნივერსიტეტში მიმდინარე პროგრამებზე ისაუბრა: „უამრავი კითხვაა, რომელიც უკავშირდება საბაკალავრო–სამაგისტრო პროგრამებს, უამრავი სიახლეა სამცხე–ჯავახეთის უნივერსიტეტში და გადავწყვიტე, რომ პირადად მე, რექტორს გამეცა კითხვებზე პასუხები“.

მისი თქმით, წელს სახელმწიფო 17 საბაკალავრო პროგრამიდან 11–ს აფინანსებს, უნივერსიტეტი კი ამ უფასო პროგრამებზე 320 აბიტურიენტს მიიღებს: „ამ პროგრამების ჩამონათვალი უნივერსიტეტის ვეგ–გვერდზეა და ნებისმიერ მსურველს შეუძლია მისი ნახვა“.

რექტორმა განსაკუთრებული ყურადღება დაწყებითი განათლების მასწავლებლის მომზადების ინტეგრირებულ საბაკალავრო-სამაგისტრო პროგრამაზე გაამახვილა. აღნიშნულმა პროგრამამ აკრედიტაცია ახლახანს გაიარა. მისი დასრულების შემდეგ სტუდენტი მაგისტრის დიპლომსა და უფროსი მასწავლებლის სტატუსს ერთდროულად მიიღებს. ამ პროგრამაზე უნივერსიტეტს 45 სტუდენტის მიღება შეუძლია და მათ შორის 35–ს სახელმწიფო დააფინანსებს.

მაკა ბერიძემ, ასევე, უცხო ენებზე უფასო კურსებისა და უნივერსიტეტის გაცვლითი პროგრამების შესახებ ისაუბრა. მისი თქმით, სასწავლებელი აფართოებს ურთიერთობებს საზღვარგარეთ არსებულ უმაღლეს სასწავლებლებთან: „ჩვენი სტუდენტები გერმანიაში გადიან პრაქტიკას. ვაწარმოებთ მოლაპარაკებებს ესპანურ უნივერსიტეტებთანაც. აქ ჩვენ სტუდენტებს აგრარული მიმართულებით შევთავაზებთ გაცვლით პროგრამებში მონაწილეობას“.

უნივერსიტეტის რექტორის ფეისბუქ ლაივი 10 წუთს გაგრძელდა. ამ დროის განმავლობაში 20–მდე კომენტარი და მხოლოდ ორი შეკითხვა დაიწერა. ერთი, უნივერსიტეტში ინგლისურ ენაზე მაგისტრარტურის გახსნას, მეორე კი სასწავლებელში ისტორიის მიმართულებით სადოქტორო პროგრამის არსებობას ეხებოდა.

მაკა ბერიძის ფეისბუქ ლაივი, უნიერსიტეტის ფეისბუქის ოფიციალური გვერდის მეშვეობით, სასწავლებლის ადმინისტრაციამ ერთი დღით ადრე დაანონსა.

[ლუბა გიორგაძე, ახალციხე]