სამცხე–ჯავახეთის უნივერსიტეტის პროგრამები აკრედიტაციას გადის

განათლების სამინისტროს ხარისხის განვითარების ეროვნულ ცენტრში საკრედიტაციო საბჭოს სამცხე–ჯავახეთის სახელმწიფო უნივერსიტეტმა ხუთი პროგრამა წარუდგინა: დაწყებითი საფეხურის მასწავლებლის მომზადების ინტეგრირებული საბაკალავრო და სამაგისტრო, ბიზნესის ადმინისტრირების საბაკალავრო, ბიზნესადმინისტრირების სამაგისტრო, ქართულ ენაში მომზადების საგანმანათლებლო და აგრონომიის საბაკალავრო.

მათ შორის, პირველი სამი პროგრამის შესახებ პასუხი ცნობილი სექტემბრამდე იქნება: „მათ შესახებ განცხადება მარტში შევიტანეთ და ამიტომ შედარებით მალე გავიგებთ გაივლიან თუ არა აკრედიტაციას. დანარჩენ ორზე კი განაცხადი სულ რამდენიმე დღის წინ შევიტანეთ და დრო მეტი დასჭირდება“, – ამბობს სამცხე–ჯავახეთის სახელმწიფო უნივერსიტეტის რექტორი მაკა ბერიძე.

მისი თქმით, აკრედიტაცია სამ ეტაპს მოიცავს: „პირველი ეტაპი პროგრამების შესახებ დოკუმენტების წარდგენას გულისხმობს. მეორე ეტაპზე უცხოელი ექსპერტები ჩამოდიან უნივერსიტეტში, იღებენ ინტერვიუებს და უნივერსიტეტს ამოწმებენ, ხოლო მესამე ეტაპზე უკვე ხარისხის განვითარების ეროვნულ ცენტრში სააკრედიტაციო საბჭოზე ექსპერტთა მიერ დაწერილი დასკვნები განიხილება“.

როგორც ბერიძე ამბობს, დაწყებითი საფეხურის მასწავლებლის მომზადების ინტეგრირებულმა პროგრამამ ორი ეტაპი, წარდგენა და ვიზიტი უკვე გაიარა: „ახლა შედეგებს ველოდებით“.

უნივერსიტეტში 20-მდე საბაკალავრო, 10–მდე სამაგისტრო, ხუთი სადოქტორო პროგრამაა. მათი აკრედიტაციისთვის სასწავლებელს ვადა 2023 წლამდე აქვს. 2020 წელს კი უნივერსიტეტმა ავტორიზაცია უნდა გაიაროს.

[მარიამ ბარძიმაძე, ახალციხე]