ადიგენის საკრებულო: 'მინარეთის დაბრუნების საკითხი 'რესპუბლიკელების' ინიცირებული არ ყოფილა

მისი განცხადებით, საკრებულოს სხდომაზე მინარეთის დაბრუნების ნებართვის გაცემა-არგაცემის საკითხი მან დააყენა.

"გამგეობიდან იყო შემოსული ნებართვის გაცემაზე დოკუმენტაცია, ყველაფრით სრულყოფილი. ერთპიროვნულად რომ არ გადამეწყვიტა, გავიტანე სესიაზე და დეპუტატებს დავუყენე საკითხი. ინიცირებული არავისგან არ იყო, მე დავსვი საკითხი და ყველამ ერთხმად დაუჭირა მხარი", - განუცხადა "სამხრეთის კარიბჭეს" ადიგენის მუნიციპალიტეტის საკრებულოს თავმჯდომარემ, "ერთიანი ნაციონალური მოძრაობის" წევრმა ემზარ ენდელაძემ.

ადიგენის მუნიციპალიტეტის საკრებულოში 24 დეპუტატია, გუშინ, 27 ნოემბერს, გამართულ სხდომას 18 მათგანი ესწრებოდა. ემზარ ენდელაძის თქმით, კენჭისყრისას თავი მხოლოდ ორმა დეპუტატმა შეიკავა, ორივე მათგანი "ქართული ოცნებიდანაა". რაც შეეხებათ "რესპუბლიკელებს", ფრაქციაში 5 წევრია, სხდომას 4 ესწრებოდა და საკითხს ოთხივემ დაუჭირა მხარი.

შეგახსენებთ, დღეს, 28 ნოემბერს, "ქართული დასის" ლიდერმა ჯონდი ბაღათურიამ განაცხადა, რომ მინარეთის დაბრუნება ადიგენის საკრებულის ფრაქცია "რესპუბლიკელების" ინიციატივა იყო, რესპუბლიკელმა დავით ზურაბიშვილმა კი განაცხადა, რომ ჭელაში მინარეთი ბიძნა ივანიშვილისა და საქართველოს პრემიერ-მინისტრის ირაკლი ღარიბაშვილის ინიციატივით აღდგა.

[sknews.ge]