ადიგენის გამგებელი: 'მინარეთის დემონტაჟი საბაჟომ განახორციელა'

ადიგენის მუნიციპალიტეტის გამგებლის სიმონ პარუნაშვილის განცხადებით, მართალია, საკრებულომ გამოსცა ბრძანება მინარეთის დემონტაჟის შესახებ, მაგრამ დღეს დემონტაჟი გამგეობის ინიციატივით არ მომხდარა.

„დღეს დემონტაჟი განახორციელა საბაჟომ. იმიტომ, რომ საბაჟოზე შემოსული იყო დარღვევით, კოდები იყო არეული, სხვა რაღაცის ნაცვლად შემოიტანეს“, - განაცხადა სიმონ პარუნაშვილმა.

მისივე თქმით, მინარეთი ნამდვილად უკანონოდ იყო მიდგმული. საქმეს ადიგენის პოლიცია იკვლევდა და გამგეობაში მიმართვა პოლიციიდან შევიდა. ამის შემდეგ, გამგეობამ საქმის შესწავლა დაიწყო. არქიტექტურის სამსახურმა მუსლიმებს ნებართვის მისაღებად დოკუმენტაციის წარდგენა მოსთხოვა.

„10 დღე ჰქონდათ ვადა, 15 აგვისტომდე უნდა შემოეტანათ გამგეობაში დოკუმენტაცია. რადგან არ წარმოადგინეს, საკრებულომ გამოსცა ბრძანება მინარეთის დემონტაჟისა და მათი დაჯარიმების შესახებ. მაგრამ, ვიმეორებ, დღეს ჩვენ არ განგვიხორციელებია დემონტაჟი“, - განაცხადა გამგებელმა.

მისივე თქმით, პოლიცია წესრიგის უზრუნველსაყოფად იყო მობილიზებული. რაც შეეხება მინარეთს, იგი საბაჟო სამსახურის თანამშრომლებმა წაიღეს: „ჩაუტარდება ექსპერტიზა და როცა ყველაფერი გაირკვევა, ალბათ ისევ უკან დააბრუნებენ“.

კითხვაზე, რამდენად ხშირად ინტერესდებიან და ზოგადად რა მდგომარეობაა ადიგენში უკანონო მშენებლობების კუთხით, გამგებელი გვპასუხობს, რომ დემონტაჟი ხშირად არ ხდება, მაგრამ არქიტექტურის სამსახური ყველა უკანონო მიშენებას სწავლობს.

[sknews.ge]