ადიგენის საკრებულოს დეპუტატი გათავისუფლებას გადაურჩა

ადიგენის მუნიციპალიტეტის საკრებულოს 7 ოქტომბრის სხდომაზე საკრებულოს წევრის, ალექსი გიგოლაშვილის სამსახურიდან გათავისუფლების საკითხი განიხილეს. ინიციატივა საკრებულოს თავმჯდომარეს ლევან ლობჯანიძეს ეკუთვნოდა. დეპუტატთა უმრავლესობამ საკითხს მხარი არ დაუჭირა.

ალექსი გიგოლაშვილი განათლების, კულტურის, სპორტისა და ახალგაზრდულ საკითხთა კომისიის თავმჯდომარეა. ლევან ლობჯანიძის განმარტებით, გარკვეული პერიოდის განმავლობაში გიგოლაშვილი სამსახურს აცდენდა. საბუთი, რის საფუძველზეც გაცდენებს საპატიოდ ჩაუთვლიდა, ვერ წარადგინა, ამიტომაც მისი საკითხი საკრებულოს განსახილველი გახდა.

დეპუტატებს უნდა გადაეწყვიტათ სასჯელის რა სახე გამოეყენებინათ გიგოლაშვილის მისამართით: გაფრთხილება, 10 დღის ხელფასის დაკავება, სამსახურიდან გათავისუფლება თუ კომისიის თავმჯდომარის პოსტის დატოვება.

„საჯარო სამსახურის შესახებ კანონში წერია, რომ თუ პიროვნება 5 დღეზე მეტ ხანს მიატოვებს სამსახურს უმიზეზოდ, მიტოვების მეორე დღიდან გათავისუფლებულად ითვლება. ამ ყველაფერმა დიდი კამათი გამოიწვია. საკითხები რიგითობის მიხედვით დავაყენეთ, პირველი გაფრთხილებას ეყარა კენჭი, რადგან 25 დეპუტატიდან მხარი 18–მა დაუჭირა, დანარჩენი საკითხებისთვის კენჭი აღარ გვიყრია“, – განაცხადა ლევან ლობჯანიძემ.

ალექსი გიგოლაშვილისთვის გაფრთხილების მიცემას „ნაციონალური მოძრაობის“ 4 დეპუტატიდან მხარი მხოლოდ ერთმა დავით ოგანეზიანმა დაუჭირა.

ალექსი გიგოლაშვილი ამბობს, რომ სამსახურის გაცდენა შვილის დაბადების გამო მოუხდა. ლობჯანიძეს გათავისუფლება წინასწარ სთხოვა და შემდეგ საბუთიც მოუტანა, თუმცა მან არ მიიღო.

„შემეძინა შვილი და მომიწია რამდენიმე დღე ნებართვის აღება ლევან ლობჯანიძისგან. მომცა თანხმობა და მითხრა დოკუმენტი წარმოადგინეო, წარვადგინე ბავშვის დაბადების ფორმა–100 საავადმყოფოდან, მაგრამ არ მიიღო. სულ რამდენიმე დღის გაცდენაზეა საუბარი“, – ამბობს ფრაქცია „ქართული ოცნება–რესპუბლიკელების“ წევრი, განათლების, კულტურის, სპორტის და ახალგაზრდულ საკითხთა კომისიის თავმჯდომარე ალექსი გიგოლაშვილი.

[თინათინ ზაზაძე, ადიგენი]