გოდერძი კუბლაშვილი: 'ქრისტიანებს დამცველი არ გვყავს'

„გულისტკივლის გამოვთქვამ იმის გამო, რომ შობის მარხვის პირველ დღეს ჭელაში მინარეთი დადგეს მართმადიდებლურ ქვეყანაში და ამაში დიდი წვლილი შეიტანა პაატა ზაქარეიშვილმა და დავით ბერძენიშვილმა. მიმდინარე მოვლენებთან დაკავშირებით მათ უნდა აიღონ პასუხისმგებლობა", - ამბობს კუბლაშვილი.

"საზოგადოებრივი დარბაზის" ხელმძღვანელი ამბობს, რომ ქრისტიანების უფლებების დასაცავად ბრძოლას გააგრძელებენ.

"ჩვენ ომს არავის გამოუცხადებთ და სხვაგვარ პროტესტის ფორმას არ მივმართავთ. ჩვენ მხოლოდ მშვიდობიანი პროტესტით და კანონიერი გზით ვიბრძოლებთ, რომ საქართველოში ქრისტიანი ადამიანების უფლებები დაცული იყოს. ამგვარი მშვიდობიანი პროტესტი საქართველოს მასშტაბით ალბათ დიდხანს გაგრძელდება. ჩვენ, ქრისტიანებმა, ჩვენი თავი ჩვენ თვითონ უნდა დავიცვათ, რადგან მსოფლიოში სხვა დამცველი არ გვყავს", - ამბობს იგი.

გოდერძი კუბლაშვილი ფიქრობს, რომ ჭელის შემდეგ მინარეთების აღმართვა სხვა მუსლიმურ სოფლებშიც დაიწყება: "ხვალ სხვა სოფელში მოინდომებენ მინარეთის დადგმას და ვინ მოსთხოვთ ამაზე პასუხს?! მთელი საქართველო რომ მინარეთებით და მეჩეთებით გაივსოს, ეს უნდა ხელისუფლებას?! თუ უნდათ, მაშინ აიღონ ამაზე პასუხისმგებლობა ღვთისა და ერის წინაშე. ყოფილ პრემიერზე ვერაფერს ვიტყვი, მე ის ვიცი, რაც ჩემი ყურით მოვისმინე, სესიის დროს როგორ ახდენდნენ ზეწოლას პაატა ზაქარეიშვილი და დავით ბერძენიშვილი ადიგენის საკრებულოს თავმჯდომარეზე".

ადიგენის მუნიციპალიტეტის საკრებულოს თავმჯდომარე ემზარ ენდელაძე გოდერძი კუბლაშვილის განცხადებას ზეწოლის შესახებ აბსურდს უწოდებს.

"როგორ შეიძლებოდა მოეხდინათ ჩემზე ზეწოლა, ისინი კოალიცია "ქართული ოცნების" წევრები არიან, მე "ერთიანი ნაციონალური მოძრაობის", არანაირი შეხება არ გვაქვს. შეიძლება დაერეკათ "ქართული ოცნების" წარმომადგენლებისთვის, მაგრამ, სხდომის მიმდინარეობისას დაზუსტებით შემიძლია გითხრათ, რომ გარეთ არავინ გასულა და არავისთვის არავის დაურეკავს", - განაცხადა ემზარ ენდელაძემ.

შეგახსენებთ, რომ გუშინ, 27 ნოემბერს, ადიგენის საკრებულომ ჭელაში მინარეთის აღმართვის გადაწყვეტილება მიიღო და იმავე საღამოს ჭელაში მინარეთი აღმართეს.

[sknews.ge]