ახალციხელი მოსწავლეების მიერ შექმნილი აპლიკაცია GOGEOGO ათასწლეულის ინოვაციის კონკურსის ფინალშია

ათასწლეულის ინოვაციის კონკურსი მეექვსედ ტარდება, მასში მონაწილეობა 350-მდე მოსწავლემ მიიღო, ფინალისთვის კი 11 გუნდი, მათ შორის ახალციხიდან, N1 საჯარო სკოლაც, გუშინ, 15 ივლისს შეირჩა.

თაკო თათეშვილის, საბა ზედგინიძისა და სალომე თათეშვილის მიერ შექმნილი ანდროიდ მობილური აპლიკაცია სახელწოდებით GOGEOGO უკვე GOOGPLAY-ში უკვე ატვირთულია და შეგიძლიათ გადმოწეროთ.

პროგრამა თაკომ დაწერა, საბამ დიზაინზე იმუშავა, ხოლო სალომემ აპისთვის ინფორმაცია შეაგროვა. მათ ფინალში მიღებული მცირე გრანტით, 1 000 ლარით შეძლეს აპლიკაციის ატვირთვა.

„ველოდი ფინალში გასვლას, რადგან საკმაოდ კარგი პროექტი გვქონდა წარდგენილი“ - გვითხრა თაკო თათეშვილმა.

GOGEOGO არის როგორც ქართული ისე ინგლისურენოვანი აპი, რომლის საშუალებითაც ტურისტი და საქართვეელოს მოქალაქეც მიიღებს ინფორმაციას როგორც ქალაქის შიდა, ასევე საქალაქთაშორისო ტრანსპორტის მოძრაობის განრიგის შესახებ. აპი ასევე უჩვენებს ავტობუსის გაჩერების რუკასაც.

პირველ ადგილზე გასული გუნდი გაემგზავრება NASA-ში, აშშ-ში. მეორე და მესამე ადგილზე გასული გუნდები, ასევე, მონაწილეობას მიიღებენ STEM პროგრამებში და/ან დაჯილდოვდებიან სხვადასხვა პრიზებით.

აღნიშნული აპლიკაციის პროტოტიპი თაკომ თავის ოთხ მეგობართან ერთად გასულ წელს შექმნა და ტექნოლოგიების კონკურსში პირველობა მოიპოვეს, თუმცა ახლა აპი უფრო მეტად დახვეწეს, განავითარეს და სისრულეში მოიყვანეს. ფინალამდე კი გუნდმა რამდენიმე ეტაპი გაიარა.

ათასწლეულის ინოვაციის კონკურსი წელს მეექვსედ ტარდება. 2019-20 წლის კონკურსში მონაწილეობა 350-მდე მოსწავლემ მიიღო. პირველ ეტაპზე 88 განაცხადი შევიდა. კონკურსი გასულ წელს გამოცხადდა. ათასწლეულის ინოვაციის კონკურსის მიზანია, ეროვნული კონკურსის საშუალებით, გამოავლინოს სკოლის მოსწავლეებისგან შემდგარი სამი გამარჯვებული გუნდი, რომლებიც წარმოადგენენ ინოვაციურ პროექტებს ტექნოლოგიების, ინჟინერიისა და საბუნებისმეტყველო მეცნიერებების დარგებში. კონკურსანტების პროექტებს შეაფასებს დამოუკიდებელი ჟიური.

კონკურსს ახორციელებს ათასწლეულის ფონდი. ფინანსური მხარდამჭერია აშშ-ის საელჩო საქართველოში. კონკურსის პარტნიორია საქართველოს განათლების, მეცნიერების, კულტურისა და სპორტის სამინისტრო და კერძო სექტორი.

[მარიამ ბარძიმაძე]