სამცხე–ჯავახეთში სკოლების რეაბილიტაცია იწყება

პროგრამა ხორციელდება აშშ-ის ათასწლეულის გამოწვევის კორპორაციასა (Millennium Challenge Corporation - MCC) და საქართველოს მთავრობას შორის 2013 წლის 26 ივლისს ხელმოწერილი მეორე კომპაქტის ფარგლებში, რომლის მიზანია საქართველოში ეკონომიკური ზრდის ხელშეწყობა ზოგადი, ტექნიკური, პროფესიული და უმაღლესი განათლების ხარისხის განვითარების გზით.

მეორე კომპაქტის მთლიანი ბიუჯეტია 140 მილიონი აშშ დოლარი, საიდანაც 54 მილიონი აშშ დოლარი სკოლების რეაბილიტაციას მოხმარდება.

საჯარო სკოლების სარეაბილიტაციო სამუშაოები 2015 წელს დაიწყება და პირველ ეტაპზე მცხეთა-მთიანეთის, სამცხე-ჯავახეთისა და შიდა ქართლის 30-მდე საჯარო სკოლას მოიცავს. სარეაბილიტაციო სამუშაოები განხორციელდება მომდევო ხუთი წლის განმავლობაში და დაგეგმილია დაახლოებით 100 სკოლის რეაბილიტაცია.

აღნიშნული ეტაპისათვის დასრულებულია 2015 წელს სარეაბილიტაციოდ შერჩეული სკოლების საპროექტო დოკუმენტაცია. სარეაბილიტაციოდ განსაზღვრული სკოლები შეირჩა ათასწლეულის გამოწვევის კორპორაციის მიერ შემუშავებული და საქართველოს მხარესთან შეთანხმებული კრიტერიუმების მიხედვით.

პროგრამას ახორციელებს „ათასწლეულის გამოწვევის ფონდი - საქართველო“, განათლებისა და მეცნიერების სამინისტროსთან და საგანმანათლებლო და სამეცნიერო ინფრასტრუქტურის განვითარების სააგენტოსთან თანამშრომლობით.

[Sknews.ge]