სომხური სკოლები მშობლიური ენის წიგნებს თვის ბოლოს მიიღებენ

დღეს, 25 ნოემბერს, საქართველოსთვის წიგნების მისაწოდებლად სომხეთის განათლებისა და მეცნიერების სამინისტრომ ტენდერი გამოაცახადა.

სომხეთის განათლების სამინისტროს დიასპორის განყოფილების ხელმძღვანელის ნუნე ვარდანიანის თქმით, 25 ნოემბერს აირჩევენ ორგანიზაციას და თვის ბოლომდე სახელმძღვანელოები საქართველოში გაიგზავნება.

სომხეთის განათლების სამინისტროში საქართველოსთვის უკვე გამზადებულია 14700 სახელმძღვანელოსა და სამუშაო რვეულის კომპლექტი.

შეგახსენებთ, რომ სომხური ენისა და ლიტერატურის სახელმძღვანელოები საქართველოში სომხეთიდან შემოდის. ორი ქვეყნის განათლების სამინისტროს შორის არსებობს ოფიციალური მიმოწერა. საქართველოს განათლების სამინისტრომ, სომხეთის განათლების სამინისტროს წერილის საფუძველზე, იშუამდგომლა ფინანსთა სამინისტროსთან და ტვირთს მინიჭებული აქვს ჰუმანიტარული ტვირთის სტატუსი.

სამცხე-ჯავახეთში 100 სომხური სკოლაა: 14 სკოლა სომხურია ახალციხის მუნიციპალიტეტის 39 სკოლიდან; 31-ა სომხური ნინოწმინდის მუნიციპალიტეტში არსებული 38 სკოლიდან და 55 სკოლა სომხურენოვანია ახალქალაქის მუნიციპალიტეტის 65 სკოლას შორის. ყველა ამ სკოლაში ათასობით მოსწავლე სამი თვეა მშობლიურ ენასა და ლიტერატურას გასული წლების სახელმძღვანელოებით სწავლობს.

[sknews.ge]