სომხეთის კულტურის სამინისტროს არაოფიციალური ვიზიტი სამცხე–ჯავახეთში

სომხეთის კულტურის მინისტრის მოადგილეს არევიკ სამუელიანსა და საქართველოს კულტურული მემკვიდრეობის დაცვის ეროვნული სააგენტოს გენერალურ დირექტორს ნიკა ანთიძეს ახალციხის მერმა გიორგი კოპაძემ უმასპინძლა.

სტუმრები ჯერ ახალციხისა და ტაო-კლარჯეთის მიტროპოლიტის მეუფე თეოდორეს რეზიდენციას ეწვივნენ, შემდეგ კათოლიკური ეკლესია და სომხური კულტურული მემკვიდრეობის ძეგლები მოინახულეს. ახალციხეში ვიზიტი დელეგაციამ ახალციხის ციხის მონახულებით დაასრულა.

„ეს არის ჩვეულებრივი მეგობრული ვიზიტი არაოფიციალურ გარემოში. ჩვენ ერთობლივად ვზრუნავთ ისტორიულ ძეგლებზე. აქედან გამომდინარე, უკვე შევთანმხდით იმაზე, რომ ჩვენი სპეციალისტები ჩართულები იქნებიან მათ ტერიტორიაზე არსებული კულტურული მემკვიდრეობის ძეგლების რეაბილიტაციაში და პირიქით“, – ამბობს ნიკა ანთიძე.

„ახალციხეს საქართველოს კულტურის სამინისტროსა და ძეგლთა დაცვის სააგენტოს ინიციატივით ვეწვიეთ. პირველად ვარ ახალციხეში და ძალიან ბედნიერი ვარ, რომ ეს შესანიშნავი ადგილი მოვინახულე, რომელიც, სხვადასხვა ეროვნების ადამიანების მეგობრომის სიმბოლოა“, – ამბობს სომხეთის კულტურის მინისტრის მოადგილე არევიკ სამუელიანი.

ახალციხის შემდეგ საქართველოსა და სომხეთის კულტურის სამინისტროს წარმომადგენლებმა ვარძიის სამონასტრო კომპლექსი მოინახულეს.





[მანანა სარაშვილი, ახალციხე]