რატომ გვიანდება სომხური ენის წიგნების დარიგება?

არაქართულენოვანი სკოლებისთვის მშობლიური ენისა და ლიტერატურის წიგნები სომხეთიდან იგზავნება. კითხვაზე რატომ ჭიანურდება სახელმძღვანელოების დარიგება, სომხეთის განათლებისა და მეცნიერების სამინისტროში ამბობენ, რომ ეს რთული პროცესია და საქართველოს დახმარებაა საჭირო.

„სახელმძღვანელოების ჩამოტანა ბევრ მუშაობას მოითხოვს. საჭიროა მათი შეძენა, რის შემდეგაც იწყება მოლაპარაკებები საქართველოს განათლების სამინისტროსთან. ვაგზავნით ოფიციალურ წერილს და ნებართვის მიღების შემდეგ ჯავახეთში სახელმძღვანელოები ჩამოგვაქვს. ორივე ქვეყნის განათლების სამინისტროები თანხმდებიან, რომ საზღვარი ერთი კვირის განმავლობაში გახსნილი იყოს, რათა სახელმძღვანელოების გადმოტანა არ შეფერხდეს. საქართველოში წერილი გამოგზავნილია. ველოდებით პასუხს“, - გვიხსნის სატელეფონო საუბარში სომხეთის რესპუბლიკის განათლებისა და მეცნიერების სამინისტროს დიასპორის განყოფილების საგარეო ურთიერთობის გამგეობის ხელმძღვანელი ნუნე ვარდანიანი.

საქართველოს განათლებისა და მეცნიერების სამინისტროში განმარტავენ, რომ სომხეთის განათლებისა და მეცნიერების სამინისტროსგან წერილი 4 ოქტომბერს მიიღეს.

„გარკვეული პროცედურების გავლის შემდეგ სომხურ მხარეს პასუხი გადაეგზავნება და ეს ბავშვები წიგნებს აუცილებლად მიიღებენ“, - ამბობენ საქართველოს განათლებისა და მეცნიერების სამინისტროს პრესსამსახურში.

ვიდრე საქრთველოსა და სომხეთის განათლების სამინისტროები სახელმძღვანელოების შემოტანის საკითხს გაარკვევენ, სომხური სკოლის მოსწავლეები მშობლიურ ენასა და ლიტერატურას გასული წლიდან შემორჩენილი სახელმძღვანელოებით სწავლობენ.

[აღუნიკ აივაზიანი, ახალქალაქი]