არაქართულენოვან სკოლებში მშობლიური ენის სახელმძღვანელოები ამ დრომდე არ მიუღიათ

ახალციხის საგანმანათლებლო რესურსცენტრში განმარტავენ, რომ საქართველოს განათლებისა და მეცნიერების სამინისტროდან ინფორმაციას ყოველდღე ელოდებიან.

ამ დროისთვის სამცხე-ჯავახეთის სომხურ საჯარო სკოლებში მოსწავლეები მშობლიურ ენასა და ლიტერატურას გასული წლის, მოძველებული სახელმძღვანელოებით სწავლობენ.

შეგახსენებთ, რომ სომხური ენისა და ლიტერატურის სახელმძღვანელოები საქართველოში სომხეთიდან უნდა შემოვიდეს. ამის შესახებ ორი ქვეყნის განათლების სამისნისტროებს შორის უკვე არსებობს ოფიციალური მიმოწერა. საქართველოს განათლების სამინისტრომ სომხეთის განათლების სამინისტროდან წერილი, რომლითაც ისინი წიგნების შემოტანაში დახმარებას ითხოვდნენ, 4 ოქტომბერს მიიღო და საპასუხო წერილიც გააგზავნა.

"ჩვენი მხრიდან ყველაფერი მოგვარებულია. ფინანსთა სამინისტრომ ტვირთს მიანიჭა ჰუმანიტარული ტვირთის სტატუსი. ახლა წიგნების შემოტანა სომხეთის განათლების სამინისტროზეა დამოკიდებული", - აცხადებენ საქართველოს განათლების სამინისტროში.

სომხეთის განათლების სამინისტროში ადასტურებენ, რომ საქართველოდან ყველა საჭირო ნებართვა მიიღეს.

”ჩვენ გვაქვს წინსვლა, გუშინ საღამოს საქართველოს განათლებისა და მეცნიერების სამინისტროდან მივიღეთ ელექტრონული წერილი შესაბამისი ნებართვებით. ახლა გვჭირდება მხოლოდ ხელშეკრულების ხელმოწერა ერთ-ერთ გადამზიდ კომპანიასთან, საბაჟო ფორმების გაკეთება და რაც შეიძლება სწრაფად გაგზავნა”, - ამბობს განათლებისა და მეცნიერების სამინისტროს საგარეო ურთიერთობებისა და დიასპორის განყოფილების ხელმძღვანელი ნუნე ვარდანიანი.

სომხეთის განათლების სამინისტრო საქართველოში 14 700 სახელმძღვანელოს კომპლექტს აგზავნის.

შეგახსენებთ, ახალციხის მუნიციპალიტეტის 39 სკოლიდან, 14 არაქართულენოვანი სკოლაა. 31 სომხური სკოლაა ნინოწმინდის მუნიციპალიტეტში არსებული 38 სკოლიდან და 55 სკოლა სომხურენოვანია ახალქალაქის მუნიციპალიტეტის 65 სკოლას შორის. ყველა ამ სკოლაში ათასობით მოსწავლე ამ ეტაპზე მშობლლიურ ენასა და ლიტეარატურას გასული წლების სახელმძღვანელოებით სწავლობს.

[მანანა სარაშვილი, ახალციხე]