ბორჯომში ხანძრის შედეგად დაზარალებულ ოჯახებს მერია დაეხმარება

ბორჯომის მერის მოვალეობის შემსრულებლის, დავით ზაალიშვილის განცხადებით, ორი დაზარალებული ოჯახიდან ერთ–ერთს ბინის ქირის ფულს გადაუხდის.

„ჩვენ ერთ–ერთმა ბინის მეპატრონემ გვითხრა, რომ წასასვლელი არსად აქვს. შევთავაზეთ, რომ მოძებნოს ბინა და ქირის ხარჯს ჩვენ დავფარავთ, იქამდე, ვიდრე მისი დამწვარი სახლის რეაბილიტაცია არ მოხდება“, – ამბობს დავით ზაალიშვილი.

ბორჯომში ჩარხისწყლის დასახლებაში ხანძარი კომერციულ ფართში 7 ივლისს გაჩნდა. კომერციული ფართიდან ცეცხლი სხვა შენობებსაც გადაედო. ხანძრის შედეგად ჯამში სამი შენობა დაიწვა.

„ფურნე სულ დაიწვა, რაც შეეხება სახლებს, იქ არ იცხოვრება, ვინაიდან სახურავი სრულიად არის დაზიანებული. წყლის ჭავლის გამო დაზიანდა ოთახებიც“, – ამბობს ბორჯომის მერის მოვალეობის შემსრულებელი დავით ზაალიშვილი.

მისივე განმარტებით, ზარალის შესწავლა უკვე დაიწყო: „ამ კვირაში ველოდებით აუდიტსაც“.

დაეხმარებიან თუ არა კომერციული ფართის მეპატრონესაც, მუნიციპალიტეტში დაზუსტებული პასუხი არ აქვთ.

„კომერციული ფართის შემთხვევაში არ ვიცით ზუსტად, როგორ მოხდება დახმარება. ვარკვევთ და კანონი როგორც მოგვცემს უფლებას იმის მიხედვით მოვიქცევით“, – გვითხრა მერის მოვალეობის შემსრულებელმა.

ამ დროისთვის უცნობია ხანძრის გამომწვევი მიზეზი, როგორც მერიაში აცხადებენ მიმდინარეობს გამოძიება და შესაბამისი სამსახურების მხრიდან მოხდება უახლოეს პერიოდში გამომწვევი მიზეზის დადგენა.

ხანძრის ქრობის დროს ერთ–ერთი ადგილობრივი დაშავდა.

[ნუკა სტეფნაძე, ბორჯომი]